Saıysqa elimizdiń 3 qalasy men 12 oblysynan jınalǵan sportshylar qatysyp, baq synasýda.
Qalyptasý kezeńi 4 myńjyldyq ýaqytty qamtıtyn túrki halyqtaryna ortaq mura toǵyzqumalaq oıyny sońǵy jyldary tek Azııada ǵana emes, tórtkúl dúnıede qarqyndy damyp keledi.
– 6 kúnge sozylatyn jarys elimizdegi toǵyzqumalaq oıynynyń damyp jatqandyǵynyń kórinisi. Qazirgi ýaqytta álemniń 27 memleketi osy sport túrimen aınalysady. Ásirese, túrki halyqtarynda oıyn jaqsy damyǵan. Jaqynda Antalııa qalasynda álem birinshiligi ótedi. Bizdiń sportshylar álem aldynda el namysyn asqaqtatady degen senim basym,– deıdi bas tóreshi Batyrhan Ábilbekov.
Jarys eki kezeńnen turady. Komandalar eki topqa bólinip irikteý oıyndaryn oınaıdy. Ár toptan sýrylyp alǵa shyqqan komandalar aqtyq márede oı jarystyratyn bolady. Shymkent qalasynan kelgen Saltanat Saparbekova ulttyq oıynnyń bul túrimen 6 jasynan bastap aınalysady eken. Sportshy qyz 25 jylda tolaǵaı tabystarymen qazaq eliniń rýhyn asqaqtatyp júrgen jan.
–Toǵyzqumalaqqa qyzyǵýshylyǵym ákemniń arqasynda paıda boldy. Qazirgi ýaqytta túrli dárejedegi saıystarda júldeli oryndardy ıelenip júrmin. О́tkizilip jatqan jarystyń birinshi aınalymynda jeńiske jettik. Osy qarqyndy sońyna deıin saqtaýǵa tyrysamyz,–deıdi toǵyzqumalaqtan halyqaralyq dárejedegi sport sheberi Saltanat Saparbekova.
Respýblıkalyq chempıonatta halyqaralyq dárejedegi sport sheberleri kóp. Dástúrli túrde ótkiziletin jarys jeńimpazdary toǵyzqumalaqtan Qazaqstan Respýblıkasynyń quramasyna enip, keler jyly uıymdastyrylatyn halyqaralyq dodalarda el namysyn qorǵaıtyn bolady.
Baıqal BAIÁDIL,
«Egemen Qazaqstan»
Aqmola oblysy