Soltústikqazaqstandyqtar úshin tirshilik náriniń birden-bir kózi–Esil ózeni. «Esil sý» memlekettik mekemesi eldi mekenderge sapaly aýyz sýdy osy ózennen jetkizedi.
Alaıda sońǵy jyldary ózenniń sýy laılanyp, tartylyp bara jatqany alańdatpaı qoımaıdy. Buǵan ortaq sý kózin lastaýshylar qatarynyń kóbeıip bara jatqanyn qossaq, jedel sheshimin tabatyn máselelerdiń az emestigi anyq ańǵarylady. Jurtshylyq tarapynan dabyldar jıi qaǵylyp jatatyny da sondyqtan. О́ńirlik ekologııa departamentine qala turǵynynan kásiporyndardyń biri Esil ózenine las sýdy tógip jatyr degen aqparat túsip, tekseris barysynda tolyǵymen rastaldy. Ekolog mamandar qalalyq “Tazartqysh, sý taratqysh jáne sý ótkizgish ǵımarattar” mekemesiniń qaldyq sýdy ózenge aǵyzyp jibergenin anyqtady.
Departament basshysynyń orynbasary Azamat Bektasovtyń aıtýynsha, qysqy ýaqytta qaldyq sýdy tógýge qatań tyıym salynǵanyna qaramastan atalmysh kásiporyn zań talaptaryn óreskel buzǵan. Elimizde birinshi kezekte adam densaýlyǵyn saqtaý, nuqsan keltirmeý jaıyn eskermeý saldarynan Esil arnasyna 153 myń tekshe metr aǵyndy sý túsken.
«Departament mamandary tekseris júrgizdi. Fakt rastaldy. Zańbuzýshylyqqa jol berip, qorshaǵan ortaǵa tıgizgen zalaly úshin 30 mıllıon teńge aıyppul salyndy», deıdi ekologııa departamenti basshysynyń orynbasary Azamat Bektasov.
О́mir ESQALI,
«Egemen Qazaqstan»
Soltústik Qazaqstan oblysy