15 aqpan - Búkilálemdik balalardaǵy qaterli isik aýrýyna qarsy kúres kúni. Bul kúnge oraı Pedıatrııa jáne balalar hırýrgııasy ǵylymı ortalyǵynda arnaıy flesh-mob ótti.
Flesh-mobqa klınıkada emdelip jatqan kishkentaı pasıentterdi qoldaý úshin ortalyqtyń barlyq onko-gematolog dárigerleri qatysty. Qoǵamnyń nazaryn qaterli isikpen kúreske aýdarý, aldyn ala tekserilýge shaqyrý, bul aýrýdy jeńýge bolatynyn kórsetý maqsatynda ótken shara aıasynda «Help today» qoǵamdyq uıymynyń jáne eriktilerdiń qoldaýymen arnaıy beınerolık daıyndaldy. Flesh-mob, búgingi tilmen aıtqanda challenge - JAQSYLYQ estafetasy retinde Qazaq onkologııa jáne radıologııa ǵylymı-zertteý ınstıtýtyna berildi.
Onkolog-dárigerler: «Qaterli isik - sońǵy úkim emes, aty jaman aýrýdy jeńýge bolady, árbir balanyń ómiri úshin kúresýge mindettimiz jáne kúrese alamyz! Eń bastysy ómirge degen qushtarlyqty joǵaltpaý kerek», deıdi.
Resmı derekterge súıensek, jylyna elimiz boıynsha qaterli isikke shaldyqqan 600-den asa bala anyqtalǵan. Jylyna orta eseppen alǵanda respýblıkalyq ortalyqtarda qaterli isikke shaldyqqan 5000-ǵa jýyq bala emdeledi.
«Osydan 25 jyl buryn elimizde balalar leıkemııasy múldem emdelmeıtin qaterli aýrýlardyń biri bolatyn. Ol kezderi bul dıagnozben aýyrǵan balalar 3-6 aıǵa jetpeı aýyr qan ketý men túrli asqynýlardan qaıtys bolatyn. Onkogematologııa bólimi qan sasıtyn. Ol kezderi dıagnozdy da týra aıtpaıtyn. Emdelýshiniń kitapshasyna tek, qysqasha – OL dep jazatynbyz. Al qazir ashyq túrde jazamyz, aıtamyz. Ata-analarmen de, balalarmen de ashyq túrde sóılesemiz, aýrý týraly túsindirip aıtamyz. Qazir onkogematologııa bóliminde kerisinshe, balalardyń kúlkisin jıi estıtin boldyq. Balalar bıleıdi, án aıtady, oıyn zaldarynda oınaıdy, arnaıy ashylǵan smart-synybynda bilimderin jetildiredi. Jiti leıkoz – úkim emes, qazirgi kúni kóp jaǵdaıda emdelip ketýde. Eń qıyn 90-jyldary biz nemis mamandarymen áriptestik ornattyq, sonyń arqasynda BFM baǵdarlamasy engizildi. Qazirgi kúni biz búkil álemde qoldanylatyn osy baǵdarlamamen emdeýdemiz. Úmitimiz joǵalǵan sol jyldary elimizde KER Germanııa qaıyrymdylyq uıymynyń qoldaýymen alǵash ret zamanaýı qural jabdyqtarmen jabdyqtalǵan onkogematologııalyq ortalyqtar ashyla bastady. Qazaqstandaǵy balalar onkogematologııalyq qyzmetiniń damýyna birden-bir eńbek sińirgen jandardyń biri, Qazaq elinen shyqqan, Qaraǵandy medısınalyq ýnıversıtetiniń túlegi – balalar onkology Valentın Geraın. Ol kóp jyl bizdiń dárigerlerge kómek qolyn sozyp, mamandarymyzdyń biliktilikterin arttyrýǵa atsalysty, sonyń arqasynda kóptegen balalarymyz aman qaldy. Ol naǵyz keńjúrekti, qaıyrymdy, eń meıirimdi jan. Biz oǵan jáne barsha nemis mamandaryna alǵysymyzdy bildiremiz. Búgingi kúni jiti leıkozǵa shaldyqqan balalardyń ómir súrýi 76 paıyzdy quraıdy. 2013 jyldan beri isikterdi emdeýdiń jańa ádisteri qoldanylýda. 2012 jyldan beri balalardaǵy gemopoezdik diń jasýshalaryn transplantasııalaý engizildi, osy jyldan beri súıek kemiginiń ishindegi allotransplantasııa jáne aýtotransplantasııa otasy 150-den asa balaǵa jasaldy. Kórsetiletin medısınalyq qyzmetterge qoljetimdilik pen sapasy jaqsarýda. Balalardyń ońaltý jaıy da qarastyrylǵan», deıdi Pedıatrııa jáne balalar hırýrgııasy ǵylymı ortalyǵynyń basshysy Rıza Boranbaeva.
Flesh-mob sońynda dárigerler, sharaǵa atsalysqan qaıyrymdy jandar men qoǵamdyq uıymdardyń ókilderi balalar men ata-analarǵa aq tilekterin bildirip, tezirek saýyǵyp ketýlerin tiledi.
Qazirgi tańda medısına qaterli isik aýrýyn da emdeýge bolatynyn dáleldedi. Búgingi kúni ol dertti jeńip, qalypty ómir súrip jatqan azamattar óte kóp. Mamandar, qaterli dertke shaldyqqan balalar aınalasyndaǵy jandardyń qoldaýyn sezinse, myqty bola túspek, deıdi. Endeshe, balalarymyzǵa únemi qoldaý kórsetip júreıik!