AITV jáne AITV/týberkýlez ınfeksııasy bar shetel azamattary Almaty qalalyq JITS aldyn alý jáne oǵan qarsy kúres ortalyǵynda tegin em ala bastady.
Bul bastama «Qazaqstandaǵy týberkýlezdi baqylaý júıesin reformalaý men týberkýlezdiń dárige tózimdi nysandarynyń menedjmentin kúsheıtý arqyly týberkýlez aýyrtpalyǵyn tómendetý» baǵdarlamasy sheńberinde JITS-pen, týberkýlezben jáne bezgekpen kúresý jónindegi Jahandyq qordyń grantynyń arqasynda júzege asyp otyr.
– Sheteldik azamattar, olardyń arasyndaǵy kópshiligi bizdiń elimizde turýǵa ruqsat almaǵan eńbek mıgranttary antıretrovırýstyq preparattardy (ARV) tegin alady. Medısına qyzmetkerleri janama reaksııalar menedjmentin, eń tıimdi dári-dármekter men emdeý syzbalaryn tańdap, keńes berý úshin udaıy klınıkalyq monıtorıng júrgizip otyr. Onyń ishinde AITV ınfeksııasy bar júkti áıelder erekshe baqylaýda, – deıdi Almaty qalalyq JITS aldyn alý jáne oǵan qarsy kúres ortalyǵynyń bas dárigeri Marat Tókeev.
Qalalyq medısına qyzmetkerleriniń bul bastamasy AITV-juqpasynyń statıstıkalyq damý derekteriniń jaǵdaıyn kórsetedi. Megapolıste tirkeletin jaǵdaılardyń tórtten biri – alys-jaqyn shetelder men Qazaqstannyń basqa qalalarynan kelgen azamattardyń úlesinde.
Týberkýlez ben AITV adam ólim-jitiminiń basty sebepshisi bolyp otyrǵandyqtan, AITV-ınfeksııasyn emdeýdiń tıimdiligin tejeıtin kedergilerdiń biri, ıaǵnı naýqastardyń ARV-preparattaryn turaqty qabyldaýǵa qulyqsyzdyǵy mamandaryd alańdatyp otyr.
Almaty qalalyq JITS ortalyǵynyń qyzmetkerleri qoǵamdyq úkimettik emes uıymdardyń aýtrıch-qyzmetkerlerimen jáne volonterlerimen birlese otyryp, eńbek mıgranttaryn qosa alǵanda, halyqtyń negizgi toptary arasynda AITV-ǵa jedel testileý ótkizip keledi. Iаǵnı keńes beredi, aqparattyq materıaldar taratady, trenıngter uıymdastyrady. Sondaı-aq AITV-ınfeksııasynyń berilý joldary jáne odan qorǵaný sharalary týraly habarlaıdy. Dostyq kabınetter men senim pýnktteri arqyly aldyn alý quraldaryn taratady.
Aınash ESALI,
«Egemen Qazaqstan»
ALMATY