Búgin Májiliste memlekettik jastar saıasatyn iske asyrý barysy týraly Úkimet saǵaty ótti.
Otyrysty ashqan vıse-spıker Gúlmıra Isımbaeva bilimdi, básekege qabiletti jas urpaqty qalyptastyrý Táýelsizdiktiń alǵashqy kúnderinen bastap Memleket Basshysy Nursultan Ábishuly Nazarbaevtyń saıasatyndaǵy basym baǵyt ekenin atap ótip, bıylǵy jyldyń «Jastar jyly» bolyp jarııalanýynyń mańyzdylyǵyna toqtaldy.
G.Isımbaeva Májilis ótkizgen «Jastarǵa ınvestısııa» halyqaralyq konferensııasynda 35 eldiń depýtattary Qazaqstannyń 2019 jyldy Jastar jyly dep jarııalaý týraly sheshimin joǵary baǵalaǵanyn atap ótti.
Úkimet saǵaty barysynda depýtattar Jastar jylyn ótkizý jónindegi 80-nen astam is-sharadan turatyn Jol kartasyn, oǵan tutastaı alǵanda shamamen 130 mıllıard teńge jumsaý boljanyp otyrǵanyn talqylady. Jumyssyzdyqty azaıtý maqsatynda Jol kartasynda «Jas maman», «Jas kásipker» baǵdarlamalardy júzege asyrý qarastyrylǵan. 100 qajetti mamandyq boıynsha mamandardy daıyndaý josparlanýda.
Vıse-spıkerdiń aıtýynsha, mamandar tapshylyǵy oryn alsa, ekinshi jaǵynan, jumys taba almaı júrgen jastardyń barshylyǵy. Memleket tarapynan kadr daıarlaýǵa qomaqty qarajat bólinýde. Mysaly, kadrlardy daıarlaýǵa 2 jyl ishinde shamamen 234 mıllıard teńge bólinip, jyl saıyn 300 myńdaı jas maman joǵary jáne kásiptik tehnıkalyq bilim alyp shyǵady.
Jastar arasyndaǵy jumyssyzdyq, resmı statıstıkaǵa sáıkes, búgingi kúni 82400 myń adamdy quraıdy. Al Elektrondyq eńbek bırjasy portalynda jumysqa ornalastyrý boıynsha 34 myńnan astam bos oryn jáne jumys berýshilerden 82 myńnan astam suranys ornalastyrylǵan.
Budan basqa, otyrys barysynda Májilis depýtattary jasóspirimder men jastardyń arasyndaǵy quqyq buzýshylyqtardyń aldyn alý boıynsha jumystardy jetildirý, azamattardyń joǵary sapaly psıhologııalyq jáne otbasylyq keńes berý múmkindigin keńeıtý týraly máselelerge nazar aýdardy.