Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebinde belgili ustaz, pedagogıka ǵylymdarynyń kandıdaty, professor Qajı Nursultanuly atyndaǵy matematıkadan I aımaqtyq olımpıada ótkizildi, dep habarlaıdy atalmysh mekteptiń baspasóz qyzmetiniń jetekshisi Ermek Isabaev.
Olımpıadaǵa 130-ǵa jýyq oqýshy qatysyp, baqtaryn synady. Bar ǵylymnyń atasy sanalatyn esepke kimniń júırik ekendigin anyqtady. Olımpıada aıasynda ádistemelik-tájirıbelik konferensııa qosa ótip, mektep muǵalimderiniń kókeıinde júrgen ózekti máseleler ortaǵa salyndy.
- Qajı Nursultanulynyń otandyq matematıka salasyna qosqan úlesi óte zor. Ol ýnıversıtette dáris bere júrip, orta mektepterdegi áriptesterine únemi qoldaý bildirip otyrǵan. Búgingi olımpıadanyń mektep oqýshylary úshin ótkizilýiniń basty sebebi de osynda. О́z mamandyǵyn jan-tánimen súıgeniniń arqasynda balalarǵa arnap «Júldegerlik júz esep», «Ertegi esepter», «Oılaý logıkasy» atty qyzyqty ári tartymdy kitaptar jazyp qaldyryp, matematıka ǵylymyna «Dıskretti matematıkalyq logıka», «Matematıkalyq logıkanyń bastamalary» syndy qundy eńbekterin mura etip qaldyrǵan. Bunyń syrtynda 300–den astam ǵylymı zertteýleri esepke jany qumar jandar úshin taptyrmas ádistemelik kómek bolary sózsiz. Olımpıada sheńberinde uıymdastyrylǵan konferensııaǵa óńir ustazdary jibergen 35 zertteý jumystarynyń 15–i iriktelip alyndy. Osy jumystar matematıka pánindegi ózekti máselelerdi ortaǵa salyp, onyń sheshilý joldaryn qarastyrady,-deıdi mekteptiń matematıka pániniń muǵalimi Gúlbarshyn Qaıyrǵalıqyzy.
Semeı qalasyndaǵy FMB Nazarbaev Zııatkerlik mektebiniń matematıka pániniń muǵalimderi Nurǵazy Seıitqazyuly, Nartaı Sovethanulylardyń aıtýynsha, konferensııa jumysyna qala muǵalimderinen bólek shalǵaıdaǵy aýdan, aýyl muǵalimderiniń óz jumystaryn jiberýi mektepte matematıka pánin oqytýda jańashyldyqtyń qajet ekenin kórsetse kerek.
Belgilengen ýaqyt ishinde «júzden júırik, myńnan tulpar» shyqqan shákirtter olımpıada jeńimpazdary bolyp tanyldy. Uıymdastyrýshylar sheshimimen I-II-III júldeli oryndary birneshe balaǵa qatar berilip, nátıjesinde Ekonomıkalyq lıseı, Byhın atyndaǵy jalpy bilim beretin, Prırechnoe orta mektepteri men kóptegen qala mektepteriniń oqýshylary oljaly qaıtty. Jeńimpazdarǵa «Sem-Slada» tort-kondıterlik ónimderiniń qarjylaı kómegimen uıymdastyrýshylar ázirlegen estelik syılyqtar tabystaldy. Al konferensııaǵa qatysýshy ustazdarǵa sertıfıkattar tabystalyp, kelesi bas qosýdyń jospary talqylandy. Mekteptiń matematıka ádistemelik birlestigi ǵalymnyń urpaǵy Gúlzıfa Nursultanovaǵa ákesiniń portretin syıǵa tabys etti.
Raýshan NUǴMANBEKOVA,
jýrnalıst