Memleket basshysy Nursultan Nazarbaev halyqqa arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty dástúrli Joldaýynda tómengi jalaqy alatyn jumysshylardyń aılyǵyn ósirý men salyq mólsherlemesin azaıtýdy tapsyrǵan bolatyn.
Qazir bul baǵytta aımaqta naqty sharalar qabyldanyp, iske asyp jatyr. Máselen, Almaty oblysyndaǵy 43 503 kásiporyndaǵy 79,4 myń jumysshynyń tómen jalaqy alatyny anyqtalǵan edi. Bıyldan bastap olardyń jalaqy mólsheri kóbeıtildi. Qazir kásiporyndardaǵy eńbek óteýi edáýir joǵarylady. Naqty esep boıynsha 14 myń jumys berýshi 32 myń jumyskerdiń jalaqysyn kótergen. Sondaı-aq oblysta bıýdjettik uıymdarda qyzmet atqaratyn 41 myń adamnyń jalaqysy orta eseppen 35 paıyzǵa kóbeıdi. Jalpy, oblys boıynsha 2018 jyly ortasha aılyq jalaqy 5 paıyzǵa ósip, tabys mólsheri 114 myń teńgeni qurapty. Munan bólek, salyq júktemesin tómendetýge oraı 133,5 myń adamnyń jalaqysy qaıta qaralǵan eken.
Elbasynyń tómengi jalaqyny kóterý týraly tapsyrmasyna sáıkes Talǵar aýdanynda da naqty sharalar qolǵa alynǵan. Aýdan ákimi Ryskeldi Satbaevtyń aıtýynsha, ótken jyldyń qorytyndysy boıynsha óńirdiń damýy oń kórsetkishtermen tolyqqan. Ásirese, «Bıznestiń jol kartasy – 2020» baǵdarlamasy boıynsha jalpy quny 1,6 mlrd teńge bolatyn 24 joba qarjylaı qoldaý taýypty. Bul óz kezeginde aýdandaǵy 1716 kásiporyndaǵy jumysty jandandyryp, 1405 nysandaǵy jumysshylardyń jalaqysyn ósirýge múmkindik berdi. Iаǵnı, aýdan boıynsha bıylǵy 1 qańtardan bastap 3903 jumysshynyń aılyǵy kóbeıip, jalaqy qory 230 mln teńgege artypty.
Munan bólek, aımaqtaǵy iri kásiporyndarda eń tómengi jalaqy mólsherin kóterý jolǵa qoıyldy. Bul bastamaǵa aldymen qosylǵandar ishinde «Almaty boıaýlary» JShS (dırektorlar keńesiniń tóraıymy Rımma Salyqova) bar. Al Ile aýdanyndaǵy «Abdı Ibragım Global Farm» JShS bas dırektory Zııathan Gasanovtyń aıtýynsha, kásiporyndaǵy eń tómengi eńbekaqy mólsheri qazir 120 000 teńge bolsa, ortasha jalaqy 353 000 teńgege jetken. Osy qatarda «Jarkent krahmal-sirne zaýyty» seriktestigi de bar. Basqarma tóraǵasy Zákirjan Kýzıev óndiriste 1200 jumysshy bar ekenin, olardyń ortasha jalaqy mólsheri óskenin, qazir 311 qyzmetkerdiń ortasha eńbekaqysy 127 000 teńgeni, al tómengi aılyq 80 000 teńgeni quraıtynyn aıtty.
Qalmahanbet MUQAMETQALI,
«Egemen Qazaqstan»
Almaty oblysy