Astana qalasynda Qoǵamdyq densaýlyq saqtaý ulttyq ortalyǵy jáne Býbnovskıı ortalyǵynyń uıymdastyrýymen «Omyrtqa jáne býyn týraly» atty semınar ótti. Reseılik dáriger Mıhaıl Býbnovskıı semınarǵa qatysýshylardy aǵzanyń kúsh-qýatyn dári-dármeksiz, ıneksııasyz jáne operasııasyz paıdalanýǵa negizdelgen emdeý júıesimen tanystyrdy.
Býbnovskıı ádistemesi omyrtqa jaryǵy, artrıt, artroz syndy býyn jáne omyrtqa aýrýlaryn emdeıtin zamanaýı kınezıterapııanyń túrine jatady. Bul ortalyq Qazaqstanda alǵash ret 2001 jyly Astana qalasynda ashylyp, 18 jyldan beri jumys istep keledi.
«Ádistiń negizgi avtory elordaǵa jıi kelip, naýqastarǵa keńes berip turady. Semınar Ulttyq densaýlyq saqtaý ortalyǵymen birlesip halyqqa bul ádispen qalaı emdeletini, osyndaı aýrýlarmen aýyrǵanda ne isteý qajet ekendigi týraly aqparat alý úshin jasalyp otyr. Qazir ár ortalyqqa aıyna 200-den astam adam keledi. Astanada 35 myńnan astam naýqas bizdiń ortalyqqa kelip, syrqattarynan aıyǵyp ketti. Bul emdeý ádisiniń ereksheligi naýqastar ózi qımyl-qozǵalysqa túsý arqyly emdeledi. Emdeý Býbnovskııdiń arnaıy jattyǵýlary arqyly júrgiziledi. Qazirgi kezde Astanada osy aýrýmen aýyratyn naýqastardy emdeýge arnalǵan 5 ortalyǵy bar», – dedi Býbnovskıı ortalyǵynyń bas dárigeri Ravıl Taırhanuly.
TMD elderi men alys shetelderde ózin kórsete bilgen ádistemeni Mıhaıl Býbnovskııdiń ákesi, reseılik belgili hırýrg, professor, medısına ǵylymdarynyń doktory, aǵzany saýyqtyrý jónindegi kóptegen kitaptyń avtory Sergeı Býbnovskıı ázirlegen. Ádistemeni qoldanǵan jyldary 1,5 mıllıonnan astam adam qozǵalý múmkindigine ıe bolǵan.
«Densaýlyq – qozǵalysta» degen uranmen jumys isteıtin Býbnovskıı ortalyǵy jáne Qoǵamdyq densaýlyq saqtaý ulttyq ortalyǵynyń mıssııasy birdeı. О́ıtkeni basymdyq – emdeý emes, halyqqa qalaı aýyrmaý kerektigin, aýrýdyń aldyn alý, densaýlyqty qalpyna keltirý sharalaryn úıretý, óz densaýlyǵyn basqarý.
«Qoǵamdyq densaýlyq saqtaý ulttyq ortalyǵy Býbnovskıı ortalyǵymen birlesip osy semınardy uıymdastyrdy. 350 adam qatysty. Onyń ishinde naýqastar, reabılıtolog jáne nevropatolog dárigerler bar. Kınezıterapııa – ejelden belgili emdeý ádisi. О́ıtkeni baıaǵyda Grekııada, Rımde osy emdeý túrin qoldanǵan eken. Medısınanyń atasy Gıpokrattyń ózi osyndaı qımylmen, dene shynyqtyrýmen emdeý tásilin paıdalanǵan. Sońǵy 30 jyldyń ishinde bul emdeý túri S.Býbnovskııdiń bastamasymen qaıta jańǵyrdy. Onyń ortalyǵy TMD elderinde ǵana emes, dúnıe júziniń basqa da elderinde ashyldy», – dedi Qoǵamdyq densaýlyq saqtaý ulttyq ortalyǵy dırektorynyń keńesshisi Dáýlethan Serǵazyuly.
Densaýlyq saqtaý salasyndaǵy áriptestik sheńberinde jeke menshik sektor men halyqtyń múddeli toptarynyń birlesken kúshterimen, uıymnyń eshqaısysy jeke qamtamasyz ete almaıtyn densaýlyq kórsetkishterin jaqsartýǵa qol jetkize alady. Osyǵan baılanysty Qoǵamdyq densaýlyq saqtaý ulttyq ortalyǵy qurylǵan sátten bastap halyqaralyq jáne qoǵamdyq birlestiktermen, densaýlyq saqtaý jáne bilim berý uıymdarymen yntymaqtastyq týraly memorandýmdar jasasty. QDSUO halyqtyń ómir súrý sapasyn jaqsartýǵa baǵyttalǵan mindetterdi sheshý aıasynda Býbnovskıı ortalyǵymen de ózara is-qımyl jasaýǵa nıetti.
«Egemen-aqparat»