Qaraǵandy oblysy, Buqar jyraý aýdany, Botaqara kentinde ótken «Sonar-2019» saıatshylyq maýsymyna oraı qazaqy tazy júgirtý saıysy ótti.
Sátbaev aýyldyq aýmaǵy ákiminiń mamany Qanat Esjanovtyń aıtýynsha, qyran baptap, qumaı tazy júgirtken bul saıysqa 12 Qumaı tazy qatysypty.
Al, 5 qumaı tazyny Baıanaýyldyń Sátbaev aýylynyń saıatshylary daıyndap alyp barǵan.
Saıys erejesine sáıkes, qumaı tazylar 3 shaqyrymǵa deıin júgirgen.
Jarys sońynda Sátbaev aýylynan qatysqan saıatshylar Ámir Jermuhanovtyń «Aqbaqaı» atty tazysy 1-shi orynǵa, Erjan Aımaǵambetovtiń «Saryqasqa» atty tazysy 2-shi orynǵa, Álıhan Dúısenbekovtiń «Aqqus» atty tazysy 3-shi oryndy, Arsylan Saǵynjannyń «Lashyny» 4-shi oryndy ıelendi.
Saıatshy Ámir Jermuhanov 24 jasta. Ol Qaraǵandy taý-ken kolledjin bitirgen, qazir Qaraǵandy polıtehnıkalyq ýnıversıtetinde syrttaı oqıdy.
Qazir Ámir aýylda óziniń sharýashylyǵynda eńbek etýde. Aqbaqaı atty qumaı tazysy 3 jasta. Tazy qalypta bolý úshin jumasyna 2 ret júgirtip, ańǵa shyǵarady eken.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany