Qaraǵandy qalasynda eki jyldan beri «Hadııa» atty qaıyrymdylyq dúkeni jumys isteıdi. Munda qala turǵyndary muqtaj jandarǵa dep kıim-keshek, azyq-túlik, keńse taýarlaryn jáne basqa da turmysqa qajetti zattar ákelip ótkizedi.
Sondaı-aq, dúken ishinde qaıyrymdylyq jáshik ornatylǵan. Oǵan jınalǵan qarajat az qamtylǵan, kóp balaly otbasylar men jalǵyzbasty analardyń turǵyn úı tólemine jumsalady.
– Biz kóp balaly jáne az qamtylǵan otbasylarǵa, balalaryn jalǵyz ósirip otyrǵan analarǵa jáne turmystyq qıyn jaǵdaıǵa tap bolǵan muqtaj adamdarǵa kómektesemiz. Osy maqsatta qala turǵyndary men kásipkerlerden balalar úshin zattar, azyq-túlik, mektep zattaryn jáne qarjylaı kómek qabyldaımyz, – deıdi «Hadııa» dúkeniniń uıymdastyrýshysy Marat Túsipov.
Qazirgi tańda «Shyǵys» saýda úıiniń ǵımaratynda ornalasqan «Hadııa» dúkeni arqyly 600-ge taman adam kómek alǵan.
– 2015 jyldan bastap Qaraǵandy oblysynda «QMDB Zeket qory» korporatıvtik qory jumys isteıdi. Búgingi kúnge deıin qor ókilderi kóptegen muqtaj adamdarǵa kómek kórsetti. Eriktilerdiń kómegimen «Hadııa» qaıyrymdylyq dúkeni ashyldy. Munda kele almaıtyndarǵa biz azyq-túlik pen zattardy ózimiz aparyp beremiz, – deıdi Ánet baba atyndaǵy meshittiń bas ımamy О́mirzaq Bekqoja.
Atalǵan qor qurylǵannan beri birneshe otbasy turǵyn úımen qamtamasyz etilgen. Jınalǵan qarajat esebinen úsh jyl buryn Suryptaý stansasynda baspanasy janyp ketken kóp balaly otbasy úshin úı salynypty. Budan bólek, byltyr úılerinde órt bolǵan eki otbasynyń shańyraǵyna jóndeý júrgizilgen.
– Bıyl qor muqtaj jandarǵa 200 tonna kómir bóldi. Kómek qajet etetin otbasylardyń tizimin ákimshilikten alamyz. Sondaı-aq, dári-dármek pen emdeý úshin qarajat jetispeıtin nemese múldem múmkindigi joq aýyr naýqastarǵa qol ushyn beremiz, – deıdi oblystyń bas ımamy.
«Hadııa» dúkenindegi barlyq zattar men ónimder muqtaj dep tanylǵan jandarǵa tegin taratylady. Olar azyq-túlik berý pýnktine 3 aıda bir ret kele alady. Dúkende bir qolǵa bir ret 10 zatqa deıin beriledi degen talap ornatylǵan.
Qaırat ÁBILDA,
«Egemen Qazaqstan»
Qaraǵandy