«Qazaqstan» ortalyq konsert zalynda belgili ánshi, kompozıtor Batyrhan Shúkenovke berilgen «Aýǵanstan soǵysynyń ardageri» estelik medalin anasyna tabystaý rásimi ótti. Is-shara Keńes Odaǵy áskeriniń Aýǵan jerinen shyǵarylýynyń 30 jyldyǵyna oraı uıymdastyryldy.
Sol kezde «Araı» tobynyń quramynda bolǵan Batyrhan Shúkenov Roza Rymbaeva, Bolat Syzdyqov, Baıǵalı Serkebaev, Nadjıb Vıldanov bastaǵan bir top qazaqstandyq ánshimen birge 1983 jyly jaýyngerlerdiń rýhyn kóterý maqsatynda Aýǵanstannyń qandy soǵys oryn alǵan urys alańyna gastroldik saparmen baryp, Qandaǵar, Qundyz, Baǵram, Kabýl qalalarynyń gospıtaldary men ashyq
alańynda konsert qoıdy. Bul sapardyń qaýpi men qıyndyǵy jóninde ánshiniń Aýǵan dalasyna birge barǵan dosy ári áriptesi Bolat Syzdyqov óz esteliginde: «Bizdiń eń qaýipti gastroldik saparymyz Aýǵan jerinde boldy. Biz ol jerde qandy soǵys oryn alǵan urys alańy Qandaǵar, Qundyz, Baǵram, Kabýl qalalarynyń gospıtaldary men ashyq alańynda konsert qoıdyq. Ol gastroldik saparda tikushaqpen spıral jasap kóterilýge májbúr boldyq. Sebebi tolassyz jaýǵan jaý oǵy bizge de baǵyttaldy», dep jazady.
Beıbit ómirde ǵana emes, halyq basyna kún týǵan qıyn-qystaý shaqtarda da azamattyq boryshyn umytpaı, eliniń janynan tabylǵan ánshiniń soǵysqa qatysqan jaýyngerlerdiń rýhyn kóterýge baǵyttalǵan erlik isi eskerilip, «Aýǵan soǵysynyń ardageri» estelik medali taǵaıyndalǵan bolatyn. О́ziniń shyǵarmashylyq jolyn «Qazaqkonsert» gastroldik-konserttik birlestiginde bastaǵandyqtan, Batyrhan Shúkenovtiń medali mekemeniń qaıta qurylýyna baılanysty 2016 jyly Ortalyq memlekettik arhıvke berilip, 2019 jyldyń basynda jańadan qurylǵan Mádenıet jáne sport mınıstrliginiń «Qazaqkonsert» memlekettik konserttik uıymyna qaıta tabystalady.
Ánshiniń ómirden ótýine baılanysty, óner ıesine baǵyttalǵan qurmet anasyna kórsetilip, «Qazaqkonsert» memlekettik konserttik uıymynyń dırektory Jeńis Seıdollauly merekelik medaldi Dılıara Shúkenovaǵa saltanatty túrde tabys etti.
– Barlyǵyńyzǵa rahmet! Men Batyrdy joq dep júrsem, balam áli tiri eken. Senderdi kórgende ózimdi baqytty sezindim. Ol Aýǵan jerindegi gastroldik saparyn jıi esine alatyn. «Elge tiri oralmaı qalamyn ba» degen qorqynyshy bolǵanyn da aıtqan. Bul medal Batyrdyń tiri kezindegi ómirimdi eske túsirgendeı. Ulym urys
alańynan kelgende qýana qarsy alyp, aman kelgenine shúkirlik aıtqanymyz kúni keshegideı jadymda saırap tur. Amal qansha?! Bul ómirge kim kelip, kim ketpedi. Olardyń izdeýsiz qalǵany qanshama?! Al Batyrdyń izdeýshisi bar. Onyń áni, shyǵarmashylyǵy halyqtyń jadynda, júreginde saqtaýly. Osyǵan myń márte shúkir deımin. Batyrdyń ólmeıtin ekinshi ómiri bastaldy», dedi Dılıara Shúkenova tolqynysyn jasyra almaı.
Sondaı-aq is-shara barysynda qazaq óneriniń damýyna ólsheýsiz úles qosqan Qazaqstannyń eńbek sińirgen qaıratkeri, ataqty ánshi ári kompozıtor, «Aýǵan soǵysynyń ardageri» medaliniń ıegeri Batyrhan Shúkenovtiń anasyna Mádenıet jáne sport mınıstri Arystanbek Muhamedıulynyń atynan quttyqtaý telegrammasy jetkizildi.
Nazerke JUMABAI,
«Egemen Qazaqstan»