Búginde ásirese jastar arasynda ádebı kitaptardyń oqylmaıtyndyǵy jıi aıtylady. Shynynda da qazirgi kezde jastardyń ádebı kitaptardan góri áleýmettik jelige kóp áýestigi baıqalady.
Árbir adam óz mamandyǵyna, jalpy ózi qyzyǵatyn taqyrybyna oraı, talǵamy men qabiletine qaraı tolassyz jaryq kórip jatqan qyrýar ónimder tizbeginen qajetti kitaptaryn tańdaı bilýiniń ózi de – óner. Múmkindiginshe kitapty talǵammen ári kóp oqý paryz, árıne. Biraq qazirgi qoǵamdaǵy pikir jastardyń kitap oqymaýyna birinshiden, áleýmettik jeliler kedergisin keltirýde dese, ekinshiden, qazir sapaly shyǵarmanyń az ekendigin alǵa tartady.
Jolymyz túsip kitaphanaǵa barǵanda jastardyń kóbi oqý zalyndaǵy kitaptardan qajetti maǵlumattaryn kóshirip alyp, jónderine júre beretinin baıqaımyz. Kósheden kitap qushaqtap júrgen jastardy da kezdestirý qıyn. Oǵan qosa búgin kitaptardy ınternet jelisine engizý de zaman talabyna saı qubylys bolyp otyr. Qazirgi kezde nebir kitaptardyń ǵalamtordaǵy nusqalary da bar. Biraq muqabasyn qolyńmen ustap, paraqtap erkin oqı beretin kitaptan artyq eshnárseniń joqtyǵyn ashyq moıyndaýymyz kerek. Qansha degenmen, búginde ýaqyty óte tyǵyz halyq úshin ınternet jelisi ońaı bolyp tur. Alaıda oqýǵa nıettengen adam ózine qajetti kitapty dúnıeniń qaı buryshynan, qandaı baǵaǵa bolsyn taýyp alady.
Biraq kitapqumar adamnyń mıllıoner bolýy da múmkin eken. Jastardy kitap oqýǵa yntalandyrý maqsatynda Taraz qalalyq «Jambyl-Taraz» gazeti jyl basynda jalpy júlde qory 3 mıllıon teńge bolatyn kitap oqý baıqaýyn jarııalady. Iá, bul bastama da jastardy kitap oqýǵa baýlıtyn jaqsy amaldyń biri. Arnaıy aqyldastar alqasy qurylyp, alqa tóraǵasy bolyp jazýshy, Qazaqstannyń eńbek sińirgen qaıratkeri Nesipbek Dáýtaıuly bekitildi. «Aqyldastar alqasy birlesip otyryp, 100 kitaptan turatyn tizim jasadyq. Onyń teń jartysy qazaq, qalǵany orys tilinde usynylady. Al baıqaýǵa qatysýshy 5-7 synyp oqýshylary keminde 15, 8-11 synyp oqýshylary 20 kitapty oqý jylynyń sońyna deıin oqyp shyǵýy tıis. Bul mejeden asqan adam baıqaý jeńimpazy atanyp, mıllıon teńge ıelenedi. Jeńimpaz oqylǵan kitaptar boıynsha suraq qoıý ádisimen anyqtalady», deıdi gazettiń bas redaktory Elmıra Myrza-Ǵalı.
Árıne Áýlıeata óńirinde mundaı mazmundy bastamanyń kóterilgeni quptarlyq. Nátıjesinde Taraz ólkesinde mektep oqýshylary arasynda kitapqumarlar ortasy qalyptasyp keledi. Máselen, Taraz qalasyndaǵy Baýyrjan Momyshuly atyndaǵy №45 gımnazııanyń 9-synyp oqýshysy Qazyna Ábdiseıit Tólen Ábdiktiń «Oń qol» shyǵarmasynyń áserimen bólisti. Oqýshy Almanyń taǵdyry ózin qatty oılantqanyn aıtady. «Jalpy, bir tánniń ishinde eki jannyń qatar ómir súrýin alǵash estýim. Oqyǵan qyzyqty áńgimelerimniń ishine «Oń qol» shyǵarmasyn da jatqyza alamyn», deıdi ol. Sonymen qatar №46 orta mekteptiń 10-synyp oqýshysy Nurlybaǵym Qudaıbergen Ýılıam Shekspırdiń «Romeo men Djýletta» kitabyn álemdegi eń ádemi mahabbat hıkaıasyna jatqyzady. «Meniń oıymsha, Romeonyń taǵdyryna Kapýlettı áýletiniń qyzdaryna ǵashyq bolý jazylǵan sekildi. Nege deseńiz, Romeo Djýlettaǵa ǵashyq bolmas buryn Rozalına atty qyzǵa ǵashyq bolady. Alaıda bul mahabbat tek oıda ǵana bolady. Al Djýlettanyń orny múlde bólek», deıdi atalǵan baıqaýǵa qatysýshy Nurlybaǵym.
Búginde elimizde ádebıetti damytý baǵytynda uıymdastyrylyp jatqan sharalar kóp. Biraq kitap oqý úshin qyrýar qarajat tigip, jastardy kitaptyń qasıetine baýlý da bir ǵanıbet. Nátıjesinde oqýshylardyń kitapqa degen qyzyǵýshylyǵy artyp, jastar arasynda oqyrmandar ortasy qalyptasady. Bul da búgingideı kitap oqylmaıdy degen ýaqytta jastarǵa kitap oqytýdyń taptyrmas ádisi.
Hamıt ESAMAN,
«Egemen Qazaqstan»
Jambyl oblysy