Búgin Astanadaǵy «Saryarqa» velotreginde basketboldan Qazaqstan ulttyq quramasy 2019 jylǵy álem chempıonatyna irikteý týrnıri aıasynda Avstralııany qabyldaıdy dep jazady Olympic.kz.
Kezdesý Astana ýaqytymen 20:00-de bastalady. Al 24 aqpan kúni Rýstam Erǵalıev bastaǵan komanda óz jerimizde Fılıppınge qarsy oınap, kim myqtyny anyqtaıdy. Tap osy eki kezdesýden soń Qazaqstan basketbolshylarynyń Qytaıdaǵy álem chempıonatyna qatysý-qatyspaýy naqty belgili bolmaq.
Basketboldan Qazaqstan quramasy birde-bir ret álem chempıonatyna qatysyp kórgen joq. Al 2019 jylǵy álem birinshiligine Azııa aımaqtyq irikteý kezeńinde bizdiń qurama 10 oıynnyń tórteýinde jeńiske jetip, F tobynda besinshi satyda keledi.
Eger Qazaqstan quramasy óz jerinde Avstralııa men Fılıppınge qarsy ótetin matchta upaı joǵaltpasa, F tobynda tórtinshi orynǵa kóterilgen quramanyń álem chempıonatyna joldama alý múmkindigi joǵarylamaq. Ol úshin komanda jeńisinen bólek, E tobyndaǵy Iordanııanyń sátsiz oıyn kórsetýi de mańyzdy bolatynyn eskertemiz.
Basketboldan Qazaqstan komandasynyń ázirge eń úlken jetistigi – Pýsanda ótken Azııa oıyndaryndaǵy qola júlde. Al 2013 jyly basketbolshylarymyz Azııa kýboginde 8-shi oryn ıelenip, álem chempıonatyna birtaban jaqyndaǵan edi.
Sarapshy Enso Floho Qazaqstan komandasynyń aldaǵy eki oıynyna boljam jasap, quramanyń álem chempıonatyna qatysý múmkindigi qaı deńgeıde ekenin aıtty.
«Qazaqstan syrt alańda Fılıppınge ses kórsetip, keıin Japonııadan jeńildi. Alaıda, olar áli jeńis úshin talasady. О́z jerinde ótetin eki oıynda Qazaqstan sapyna Entonı Klemmons qosylmaqshy. Bul oıynshy komandany kúsheıteri sózsiz. Degenmen, eki oıyn da «dala arlandary» úshin ońaıǵa soqpaıtynyn aıtky keledi. Avstralııa álem chempıonatyna joldama alǵanyna qaramastan, sońyna deıin shaıqasady. О́ıtkeni, chempıonat barysynda jaqsy topqa túsý úshin baryn salady. Fılıppın óz jerinde ketken eseni qaıtaryp, sońǵy joldamaǵa talasady. Qazaqstan jeńiske jetý úshin olardyń eń mańyzdy oıynshylary – Rústem Erǵalı, Alekseı Jıgýlın jáne Anton Bykovtar aıanyp qalmaýy kerek», - deıdi maman.
Eske sala keteıik, basketboldan álem chempıonaty 31 tamyz ben 15 qyrkúıek aralyǵynda Qytaıda ótedi.