Bıyl Indýstrııalandyrý baǵdarlamasy aıasynda jalpy somasy 1,1 trln teńgeni quraıtyn 120 joba iske qosylady. Sonyń negizinde 20 myń turaqty jumys orny ashylmaq. Bul týraly búgin Indýstrııa jáne ınfraqurylymdyq damý mınıstrliginiń keńeıtilgen alqa májilisinde vedomstvo basshysy Jeńis Qasymbek málimdedi.
Mınıstr Jeńis Qasymbek atap ótkendeı, 2018 jyldyń qorytyndysynda barlyq kórsetkishter boıynsha oń dınamıka baıqalady. О́nerkásip 4,1%-ke ósti, sonyń ishinde taý-ken 4,6%-ke, óńdeý ónerkásibi 4%-ke ósken.
Mınıstrdiń aıtýynsha sonymen qatar, Qazaqstan arqyly ótetin tranzıtti konteınerlik tasymal kólemi turaqty ósip keledi. «2018 jyly konteınerlik tasymal kólemi 537,4 myń JFE-ti qurady. Bul 2017 jyldyń sáıkes kezeńimen salystyrǵanda 55%-ke artyq. Sonyń ishinde Qytaı-Eýropa-Qytaı baǵyty boıynsha kórsetkish 54,6%-ke ósip, 310,8 myń JFE-ti qurady. 2019 jyly konteınerlik tasymal kólemin eki esege, ıaǵnı 1,2 mln JFE-ke deıin arttyrý josparlanyp otyr. Osylaısha, búgin Qazaqstandy Eýrazııa ortalyǵynda qalyptasqan tranzıttik hab dep aıtýǵa bolady», - dedi Jeńis Qasymbek.
Buǵan qosa, 2019 jyly respýblıkalyq mańyzy bar 4,4 myń km jol qaıta jańǵyrtylatyn bolady. Jyl sońynda 654 km jolda qozǵalysty ashý josparlanýda. Respýblıkalyq mańyzy bar 1,7 myń km avtojoldy jóndeý josparlanyp otyr. Onyń ishinde 518 km jolǵa kúrdeli jóndeý, 1 190 km avtojolǵa ortasha jóndeý jumystary júrgiziledi. Jergilikti jelidegi 4 myń km jol jóndeledi. О́tken jyldyń tendensııasy saqtalǵan jaǵdaıda, 2025 jylǵa qaraı jergilikti joldardyń jaqsy jáne qanaǵattanarlyq jaǵdaıyn 85%-ke deıin jetkizý josparlanyp otyr. Ol shamamen 60 myń km jol.
Alqa májilisi otyrysynda Indýstrııalandyrý, «Nurly jol» jáne «Nurly jer» memlekettik baǵdarlamalaryn iske asyrý, sondaı-aq shıkizattyq emes eksportty, tehnıkalyq retteýdi, geologııa jáne jer qoınaýyn paıdalanýdy, kólik jáne logıstıkany, azamattyq avıasııany, qurylys pen turǵyn úı-kommýnaldyq sharýashylyqty, ınnovasııa men ónerkásipti sıfrlandyrýdy ilgeriletý máseleleri qaraldy. Mınıstrliktiń alqa májilisine Premer-mınıstrdiń birinshi orynbasary Asqar Mamın, Indýstrııa jáne ınfraqurylymdyq damý mınıstri Jeńis Qasymbek, Parlament depýtattary, memlekettik organdar men qoǵamdyq uıymdardyń ókilderi qatysty.
Erkejan AITQAZY,
«Egemen Qazaqstan»