Elbasy Nursultan Nazarbaev Úkimetti taratý týraly Jarlyqqa qol qoıdy. Premer-Mınıstr mindetterin ýaqytsha atqarý Asqar Uzaqbaıuly Mamınge júkteldi.
«Qazaqstan Respýblıkasy Konstıtýsııasynyń 70-babyna sáıkes QAÝLY ETEMIN:
1.Qazaqstan Respýblıkasy Úkimetiniń ornynan túsýi qabyldansyn.
2. Qazaqstan Respýblıkasy Premer-Mınıstri mindetterin ýaqytsha atqarý Asqar Uzaqbaıuly Mamınge júktelsin.
3. Qazaqstan Respýblıkasy Úkimetiniń músheleri Úkimettiń jańa quramy bekitilgenge deıin óz mindetterin atqarýdy jalǵastyra bersin.
Osy Jarlyq qol qoıylǵan kúninen bastap qoldanysqa engiziledi», delingen Aqordada jarııalanǵan Jarlyqta.
A.Mamın 2016 jyly Premer-Mınıstrdiń birinshi orynbasary bolyp taǵaıyndalǵan bolatyn.
Asqar Uzaqbaıuly 1965 jyly týǵan. Selınograd ınjener qurylysy ınstıtýtyn, G.B.Plehanov atyndaǵy Reseı ekonomıkalyq akademııasyn ınjener-qurylysshy, ekonomıst mamandyǵy boıynsha bitirgen. Eńbek jolyn «Selıntıajstroı» tresinde montajdaýshy bolyp bastaǵan.
1996–2008 jyldar aralyǵynda Astana qalasy ákiminiń birinshi orynbasary, Kólik jáne kommýnıkasııa vıse-mınıstri, Indýstrııa jáne saýda birinshi vıse-mınıstri, Qazaqstan Respýblıkasy Kólik jáne kommýnıkasııa mınıstri, Astana qalasynyń ákimi qyzmetterin atqarǵan.
2008 jylǵy sáýirden «Qazaqstan temir joly» Ulttyq kompanııasy» aksıonerlik qoǵamynyń prezıdenti.
1998 jyly «Eren eńbegi úshin» medalimen, 2006 jyly «Qurmet» ordenimen, 2011 jyly ekinshi deńgeıli «Barys» ordenimen, 2010 jyly orys pravoslavıelik shirkeýiniń Áýlıe knıaz Máskeýlik Danııldiń 3-deńgeıli ordenimen, 2013 jyly Fransýz Respýblıkasynyń Qurmetti Legıony jáne Latvııa Respýblıkasynyń «Tanym kresti» ekinshi deńgeıli ordenimen, 2014 jyly Ispanııa Koroldiginiń «Azamattyq eńbegi úshin» birinshi deńgeıli ordenimen marapattalǵan.