Premer-Mınıstrdiń orynbasary Asqar Jumaǵalıev jumys saparmen Qyzyljar óńirine kelip, birqatar kásiporyndy aralady.
Úkimet basshysynyń orynbasary «S.M. Kırov atyndaǵy zaýyt» AQ-da bolyp, «Sıfrlyq Qazaqstan» memlekettik baǵdarlama aıasynda atqarylyp jatqan jumystarmen tanysty. Zaýyt telemehanıkalyq, radıobaılanystyq bólshekter jasaýmen aınalysady. Búginde sandyq efırlik jáne spýtnıktik televıdenıege arnalǵan qurylǵylar suranysqa ıe. Osyǵan oraı iri kompanııalarmen kelisimshart jasalyp, tehnologııalyq jańǵyrtýǵa úlken kóńil bólinip keledi.
Asqar Qýanyshuly ujymmen kezdesý kezinde óńir ekonomıkasynyń barlyq salasyna sıfrlyq ozyq ádisterdi engizý qajettigin, munyń ózi eńbek ónimdiligin arttyrýǵa aıtarlyqtaı yqpal etýmen qatar sapa men jedeldilikke de áseri zor ekenin atap ótti.
Budan keıin Petropavl aýyr mashına jasaý zaýytyna aıaldap, negizgi jumys baǵyttarymen tanysty. Munda gaz-munaı salasyna arnalǵan jabdyqtar men qurylǵylar shyǵarylady. Jańǵyrtý jáne tehnıkalyq ózgerister sharalary dáıektilikpen júzege asyrylyp keledi. Sıfrlandyrý eń mańyzdy baǵyttardyń biri sanalady. Kelisimsharttar nátıjesinde tapsyrys portfeli molaıyp, jumysshy-qyzmetkerlerdiń jalaqysy kóbeıgen.
A. Jumaǵalıev ónerkásip ónimderiniń óndirisin tehnologııalyq jaǵynan úzdiksiz jańǵyrtý, sapany basty nazarda ustaý, úzdik jobalarǵa qoldaý jasaý, jańa sehtardy iske qosý, ınvestısııa tartý máseleleri boıynsha birqatar mindet júktedi.
О́mir ESQALI,
«Egemen Qazaqstan»
Soltústik Qazaqstan oblysy