Premer-Mınıstrdiń orynbasary-Qorǵanys jáne aeroǵarysh ónerkásibiniń mınıstri Asqar Jumaǵalıev Petropavlda jumys isteıtin «DIGITAL URPAQ» /«Sandyq urpaq»/ dep atalatyn Oqýshylar saraıynyń jumysymen tanysqanda osyndaı baǵa berdi.
Ol robototehnıka, bıotehnologııa, mehatronıka jáne 3D túptúrlilik ortalyqtaryń aralady. «Digital URPAQ» saraıy – Elbasynyń soltústikqazaqstandyq balalarǵa jasaǵan baǵa jetpes syıy. Qazirgi ýaqytta munda robototehnıka, kórkemóner, mádenıet, naqty ǵylymdardy qamtyǵan 87 úıirme bar. Úkimet basshysynyń orynbasary zamanaýı bıotehnologııalyq zerthanada túrli zertteýlermen aınalysatyn oqýshylarmen jaqynyraq tanysty.
«Myna mıkroskoptar eń ozyq zamanaýı qurylǵy bolyp tabylady. Osynyń arqasynda oqýshylar túrli ári qyzyqty zertteý jumystaryn júrgizedi.Nátıjesinde olar hımııa jáne bıologııa ǵylymdaryn tereńirek biledi», dedi oblys ákimi Qumar Aqsaqalov zerthana jaıly jan-jaqty túsinikteme berip.
Oqýshylar qubyrdan alynǵan jáne las sýdyń aıyrmashylyqtaryn taldaý, molekýlıarly bıologııa, medısına jáne agroónerkásip salasynyń qyr-syryn úırenip júr. Sonymen qatar olar ónimdilikti arttyrý boıynsha tehnologııalardy da zertteıdi.
Oqýshylar saraıynyń birinshi qabatynda balalar vakýýmdy kınoteatr men terrarıým oıyn-saýyq kabınetterinde jattyǵady. Ekinshi qabatta ornalasqan kovorkıng ortalyǵynda startap jobalaryn iske asyrady. Nysannyń basqa bólikterinde IT ortalyqtar, hımııa, bıologııa, fızıka kabınetteri ornalasqan. Úıirmeerge bir mezgilde 1800 bala qatysa alady.
О́mir ESQALI,
«Egemen Qazaqstan»
Soltústik Qazaqstan oblysy