«Birge baraıyq» jobasynyń tórtinshi sanyn kóp adamǵa keri áserin tıgizip júrgen ádetterden arylýǵa arnaǵymyz keledi. Onyń negizgi sebebi de joq emes, bul – bizdiń qanymyzǵa sińgen qasıet.
Ádette qazaqy qaýym psıhologtyń aldyna baryp, kómek suraýdy ersi kóredi. Alaıda búginde ony qalypty qabyldaıtyndardyń qatary kóbeıgen. Osy eki tarapqa da paıdaly bolatyn ortalyqpen jaqynda tanystyq. Astanadaǵy «О́ner sheberhanasy» dep atalatyn ortalyq osy jyldyń basynda eresekterge arnap art-terapııa tobyn ashqan. Art-terapııa týraly jıi estigen bolarsyz, biraq kóbine balalarǵa arnalǵan degen uǵym qalyptasqan.
Olaı emes, óıtkeni emosııa kez kelgen adamda bar. Jáne ony syrtqa shyǵarý barlyǵymyzǵa qajet. Ortalyq dırektory, psıholog Jadyragúl Jıenǵazıeva: «Bizdiń mentalıtette qýanǵanyńdy kóp kórsetýge bolmaıdy, kóz tıedi. Qaıǵyrǵanyńdy bildirýge bolmaıdy, osal dep oılaıdy. Al sezimdi, emosııany, tipti aıtaıyn degen sózdi irkip, ishte saqtaý kúızeliske alyp kelýi múmkin. Budan bólek, bizdegi erli-zaıyptylardyń ajyrasýynyń kóptigine birazymyz mán bere bermeıtin bir sebebi – juptardyń shúıirkelespeýi. Oıyn aıtpaý, qalaýyn bildirmeý, sózin jetkizbeý túsinispeýshilikti týdyrady», deıdi. Onyń aıtýynsha, eresekterge arnalǵan top tájirıbesindegi kezdesken juptardyń jáne ózin tanýǵa umtylǵysy keletin jandardyń nıetinen soń ashylǵan.
Eresekterge arnalǵan art-terapııa tobynda senbi-jeksenbi saıyn ártúrli oıyn-saýyq oryndarynda, keńsede, saıabaqta tanymdyq, damytatyn, jan dúnıeni tynyshtandyratyn jáne ózińiz bilmegen jańa qyryńyzdy ashýǵa múmkindik beretin oıyndar, tapsyrmalar, pikir almasýlar uıymdastyrylady. Astanalyqtar men qala qonaqtaryna: «О́ner sheberhanasy» «Arnaý» turǵyn-úı kesheni, 6-keńsede ornalasqan. Al ózge óńirdegiler art-terapevt nemese psıholog mamandaryna qolqa salsa bolady.
Aıdana ShOTBAIQYZY,
«Egemen Qazaqstan»