«Egemen Qazaqstan» gazetiniń 100 jyldyq mereıtoıy qasıetti Abaı elinen, alashtyń astanasy - Semeı qalasynan bastaldy.
Semeıge arnaıy jumys saparymen kelgen «Egemen Qazaqstan» gazetiniń Basqarma tóraǵasy Darhan Qydyráli qaladaǵy Shákárim atyndaǵy memlekettik ýnıversıtette bolyp, «AKME» halyqaralyq klýbynyń aıasynda kezdesý ótkizdi.
Jıyndy alǵy sózben ashqan Shákárim ýnıversıtetiniń rektory, professor Meıir Eskendirov elimizdiń bas basylymyn mereıtoıymen quttyqtaı kele, aldaǵy ýaqytta Elbasy Nursultan Nazarbaevtyń «Uly dalanyń jeti qyry» tarıhı maqalasy men «Rýhanı jańǵyrý» baǵdarlamasyna oraı birlese jumys isteýdi ótindi.
Al «Egemen Qazaqstan» gazetiniń basshysy osy halyqaralyq klýb aıasynda qazirgi zamanǵy jýrnalıstıkadaǵy ózgerister jáne soǵan oraı el gazeti «Egemen Qazaqstannyń» zamanaýı betalysy, sońǵy tehnologııalyq ózgerister jaıly keńinen áńgimelep berdi.
Keleli áńgimege Shákárim ýnıversıtetiniń professory Arap Espenbetov, abaıtanýshy ǵalym Ǵarıfolla Esim, «Egemen Qazaqstan» gazetiniń ardagerleri, qurmetti jýrnalıster Dáýlet Seısenuly, Ońdasyn Elýbaılar da qosyldy. Jıyn onlaın rejımi túrinde júrgendikten is-sharaǵa tikeleı qosylǵandardyń bári tamashalady. D.Qydyráli «Rýhanı jańǵyrý» óńirlik ofısiniń jumysymen tanysyp, aqyndar mektebiniń shákirtterimen júzdesti. Olardyń jýrnalıstıka, tarıh, túrkologııa salasyna baılanysty qoıǵan suraqtaryna jaýap berdi.
Raýshan NUǴMANBEKOVA,
«Egemen Qazaqstan»
SEMEI