Taraz qalasyndaǵy «Balasaǵun» ortalyq konsert zalynda Jambyl oblysynyń ákimi Asqar Myrzahmetov óńir halqyna esep berdi. Esepti kezdesýde ákim búgingi tańda oblysta barlyq sala boıynsha oń dınamıkanyń qalyptasyp otyrǵanyn aıtty.
Ákim óz baıandamasynda ótken jyly ónerkásip ónimi 102,6, ınvestısııa kólemi 108,4, jumys istep turǵan shaǵyn jáne orta kásipkerlik sýbektiler sany 107,8 paıyzǵa oryndalǵanyn aıtty. Sonymen qatar, Jambyl oblysynda egistik jerler 38 myń gektarǵa kóbeıip, 668 myń gektarǵa jetken. Údemeli baqtar 200 gektarǵa deıin artyp, 625 gektar bolsa, sý únemdeý tehnologııasy 21 paıyzǵa kóbeıtilgen.
Esepti kezdesý barysynda ákim ótken jyly 1,6 myń tonna qoı eti eksporttalyp, kórsetkishtiń 5 esege óskenin atap aıtty. Sonymen qatar, 1,0 myń tonna sıyr eti eksporttalyp, 9 esege deıin artqan. Aýyl sharýashylyǵy salasynda aıta keter taǵy bir jańalyq, ótken jyly 55 kooperatıv qurylyp, 1500 usaq sharýalar biriktirilgen, nátıjesinde 12 myń tonna ónim óndirilgen. Kórsetkish boıynsha aýyl sharýashylyǵy ónimi 265 mıllıard teńgeni qurap otyr.
Asqar Myrzahmetov óz esebinde byltyrǵy jyly 482,3 myń sharshy metr turǵyn úıdiń paıdalanýǵa berilgenin atap kórsetti. «Nurly jer» baǵdarlamasy aıasynda 1673 otbasyǵa 28 kóppáterli úı berilip, 38 ınjenerlik ınfraqurylym jobalary iske asyrylǵan. Al balama elektr qýatynyń úlesi jospardaǵy 14 paıyzdan asyp, 16 paıyzǵa jetken.
Qazirgi kezde óńirdegi úlken máseleniń biri kógildir otyn tartý máselesi. Bul rette ákim 377 eldi mekenniń 48 paıyzy gazdandyrylǵanyn, endi 81 eldi mekenge magıstraldy gaz qubyry qurylysyn bastaýǵa 6,1 mıllıard teńge bólinetinin jetkizdi. Sonymen qatar, aýyz sýmen qamtylǵan eldi mekender úlesi 199 bolyp, 53,3 paıyzdy quraǵan. Endi sý qubyry joq 13 eldi mekendi sýmen qamtýǵa bıyl 4 mıllıard teńgeden astam qarajat bólinýde. Al, Elbasy Joldaýynda aıtylǵan tarıfterdi tómendetý boıynsha óńirde gaz baǵasy 6,3 jáne elektr qýaty 7,2 paıyzǵa tómendegen. Taǵy bir mańyzdy másele, Asqar Myrzahmetov halyqty áleýmettik qoldaýǵa, onyń ishinde kópbalaly jáne az qamtylǵan otbasylardy qoldaý maqsatynda 30,6 mıllıard teńge bólinip otyrǵanyn, nátıjesinde 10 jataqhana salynatynyn da aıtty.
О́z kezeginde jambyldyq jurtshylyq Asqar Myrzahmetovke jol, mektep, sý, gaz jáne ózge de sala boıynsha suraqtaryn qoıyp, naqty jaýaptar aldy. Máselen Shý aýdanynyń turǵyny Qazaqbaı Baıjumanuly qant qyzylshasyn Merki qant zaýytyna jetkizý qıyn ekenin, sondyqtan aýdandaǵy burynǵy qant zaýytynyń alańyna qaıta zaýyt salýǵa bola ma degen saýal joldady. Sonymen qatar, turǵyn ákimnen búginde 21 syńnan astam halqy bar Tóle bı aýylynda sport kesheniniń joq ekenin de aıtty. О́z kezeginde Asqar Myrzahmetov zaýyt salý úshin keminde 30 myń tonna ónim bolý kerektigin, biraq aýdan boıynsha mundaı ónimniń joq ekenin jetkizdi. Turǵynnyń ekinshi suraǵyna ákim quny 2 mıllıard teńge bolatyn 170 jobanyń iriktelgenin, sondyqtan bul másele josparda bar ekenin aıtty. О́z sózinde Talas aýdany, Aqkól aýylynyń turǵyny Turǵynbaı Tájibekuly jol máselesin kóterip, aýyl halqynyń aýdan ortalyǵy Qarataý qalasyna qaraı barý úshin jol azabyn kóretinin aıtyp, bul máseleniń qashan sheshiletinin surady. О́z sózinde ákim joldyń jobalyq smetalyq qujattamasy jasalyp, ol memlekettik saraptamadan ótýde ekenin, eger ótken jaǵdaıda qarajat bólinip jumystyń bastalatyndyǵyn aıtyp, jaýap berdi. «Shalǵaı Qarasý» alqaby turǵyndarynyń atynan sóz alǵan Qaırat Shahanov ne sebepti munda 150 ǵana úıdiń aýyzsýmen qamtylǵanyn kóterdi. Ákim óz jaýabynda bul másele tolyq taldanǵanyn, tıisti jumystar atqarylatynyn málimdedi. Al Taraz qalasynyń turǵyny Asan Úsenbaıuly Jambyl oblysymen Almaty, Shymkent qalalaryn jáne Qyrǵyz Respýblıkasyn baılanystyryp jatqan aınalma joldyń ne sebepti aıaqtalmaı qalǵanyn surady. Asqar Myrzahmetov bul oraıda shynynda da Qyrǵyz Respýblıkasynyń shekarasyna deıingi 16 shaqyrym joldyń salynbaı qalǵanyn aıtyp, bul jumystyń bıylǵy jyly jalǵasyn tabatynyn aıtty.
Hamıt ESAMAN,
«Egemen Qazagstan»
Jambyl oblysy