Búgin Aqmola oblysynyń ákimi Málik Myrzalın halyqqa esep berý kezdesýin ótkizdi.
Eldiń áleýmettik-ekonomıkalyq damýynyń ózekti máselelerin sheshý jáne qazaqstandyqtardyń ál-aýqatyn odan ári arttyrý jónindegi mindetter údesinen shyǵý úshin oblysta birqatar mańyzdy sharýalar atqarylýda. Ol jaıynda oblys ákiminiń «Aqmola oblysynyń 2018 jylǵy áleýmettik-ekonomıkalyq damý qorytyndylary jáne 2019 jylǵa arnalǵan negizgi mindetter týraly» esebinde tolyq qamtydy. Baıandamashy óz sózinde oblys ekonomıkasynyń údemeli damýy, Elbasymyz qoıǵan barlyq mindetterdi tabysty iske asyrý úshin jetkilikti negiz qurylǵandyǵyn ekpin túsire aıtyp ótti. 2018 jyldyń qorytyndysy boıynsha barlyq negizgi baǵyttarda oń nátıjelerge qol jetkizilipti. Ekonomıkanyń bes bazalyq salasynyń óndiris kóleminiń ósýi esebinen qysqa merzimdi ekonomıkalyq ındıkator 105 prosentti quraǵan. 478 myń sharshy metr turǵyn úıdi paıdalanýǵa berý, 4700-den astam otbasyna turǵyn úı jaǵdaıyn jaqsartýǵa múmkindik berilgen. Ortasha aılyq jalaqy 9,4 prosentke ósip, 120523 teńgeni qurady. 12,7 myń jańa jumys orny ashylǵan.
Shaǵyn jáne orta bıznesti damytý – kez-kelgen el ekonomıkasynyń negizi. Jyl saıyn memleket bıznes júrgizý úshin jaǵdaıdy jaqsartyp, jobalardy qarjylandyrý kólemin ulǵaıtýda. 2018 jyldyń qorytyndylary boıynsha shaǵyn jáne orta kásipkerlik salasynda 132,7 myń adam nemese oblystyń ekonomıkalyq belsendi halqynyń 31 paıyzy jumyspen qamtylǵan. (2017 jylǵa qaraǵanda 6 prosentke ósti). 6614 jańa jumys orny ashyldy. Oblys bıýdjetine shaǵyn jáne orta kásipkerlik sýbektilerinen 2017 jylǵa qaraǵanda 3,8 prosent ósimmen 37,1 mıllıard teńge tústi. Jalpy óńir óniminiń úlesi 27 prosentti qurap otyr. «Bıznestiń jol kartasy» baǵdarlama aıasynda 2018 jyly 3,4 mıllıard teńge bólindi, 353 joba qoldaý tapty. 479,4 mıllıon teńge salyq tólendi, 797 jumys orny ashyldy. Shaǵyn bıznesti damytý úshin kásibin jańadan bastaǵan kásipkerlerge óz isin ashýyna qaıtarymsyz úsh mıllıon teńgege deıin alýǵa múmkindik beretin granttyq qarjylandyrý mańyzdy qural bolyp tabylady. 18 kásipkerge 40 mıllıon teńge qarjy bólindi. Ekinshi deńgeıdegi bankter shaǵyn jáne orta kásipkerlik sýbektilerine 67,8 mıllıard teńge kóleminde nesıe berdi.
2018 jyly 478 myń sharshy metr turǵyn úı paıdalanýǵa berildi. Oblys boıynsha barlyǵy 4707 otbasy turǵyn úı jaǵdaıyn jaqsartty. 2018 jyly turǵyn úı qurylysyna 8,1 mıllıard teńge tartyldy, onyń ishinde respýblıkalyq bıýdjetten – 4,4 mıllıard teńge, oblystyq bıýdjetten – 2,4 mıllıard teńge.
Jeke turǵyn úıdi paıdalanýǵa berý qarqyny 108 paıyzdy qurady. 270 myń sharshy metr turǵyn úı paıdalanýǵa berildi. Ár otbasyna turǵyn úı satyp alýǵa ótken jyly jalpy kólemi 1,8 mıllıard teńgeni quraıtyn 213 ótinim maquldandy.
Baıandamashy óz sózinde syrtqy ekonomıkalyq qyzmet, aýmaqtyq damý, jumyspen qamtý jáne áleýmettik qorǵaý, mádenıet jáne sport, jastar jáne ishki saıasat taqyryptarynda qol jetken tabystardy saralady. Aldaǵy mindetterge toqtaldy. Bıyl baıandy bolǵan is keler jyly jalǵasyn tappaq. Kezdesýge jınalǵan jurtshylyq tarapynan jol qatynasy, turǵyn úı máselesi, aýyz sýmen qamtý tárizdi ózekti máselelerge qatysty suraqtar qoıyldy.
Baıqal BAIÁDIL,
«Egemen Qazaqstan»
Aqmola oblysy