Qazaqstan teńgesi banknottaryndaǵy mátin endi tek qazaq tilinde jazylady. Bul týraly QazAqparat habarlady.
«Ulttyq valıýta - Qazaqstan teńgesi banknottary men monetalary dızaınynyń tujyrymdamasyn bekitý týraly» QR Prezıdentiniń 2018 jylǵy 12 jeltoqsandaǵy № 804 Jarlyǵynda teńge mátini qazaq tilinde jazylatyny aıtylǵan.
«Banknottar men monetalar dızaınynda paıdalanylatyn jazbalar mátini memlekettik tilde resimdeledi. Investısııalyq jáne kolleksııalyq monetalar dızaınynda shet tilderde jazbalar paıdalanýǵa jol beriledi», - delingen Qazaqstan teńgesi banknottary men monetalary dızaınynyń tujyrymdamasynyń 2- taraýynda.
Sonymen qatar onda ınvestısııalyq jáne kolleksııalyq monetalar dızaınynda monetalar daıyndalǵan metaldy, onyń synamyn jáne massasyn bildiretin jazbalardy paıdalanýǵa jol beriletini atap ótilgen.
Aıta keteıik, buǵan deıin banknottar men monetalarda memlekettik jáne orys tilderindegi jazýlar paıdalanylatyny zańdy kúshinde bolǵan edi.
«Shet tilinde resimdeletin basqa elderdiń tapsyrystary boıynsha daıyndalatyn kolleksııalyq monetalardy qospaǵanda, kolleksııalyq jáne ınvestısııalyq monetalarda jazýlardyń mátini memlekettik, sondaı-aq orys nemese shet tilderinde resimdeledi», -dep jazylǵan edi qujatta.