Qaraǵandy oblysynyń ákimi Erlan Qoshanov turǵyndar aldyndaǵy esepti kezdesýde «Rýhanı jańǵyrý» baǵdarlamasynyń óńirde qalaı júzege asyp jatqanyn aıtty.
Oblysta atalǵan baǵdarlamany júzege asyrý úshin 18 mlrd teńge jumsalady. Onyń 10 mlrd teńgesi mesenattar men demeýshilerge tıesili. Bul qarajatqa 2022 jylǵa deıin 479 jobany iske asyrý josparlanǵan.
Sondaı-aq, óńir basshysy baǵdarlamaǵa ún qosyp, ıgi isterimen kózge túsip júrgen birneshe qaraǵandylyqtyń esimin atady. Olardyń ishinde sportshy Habıb Nurmuhamedovti shaqyryp, jetim balalarmen kezdesý uıymdastyrǵan Aleksandr Korogodov, aǵylshyn tilin kópbalaly jáne az qamtylǵan otbasylardyń balalaryna tegin úıretip júrgen Erlan Rahymov, aýyr syrqatty balany asyrap alǵan Maqajanov atyndaǵy oblystyq klınıkanyń dırektory Erkin-Dáýir Qurmanǵalıev jáne basqalar bar.
Sonymen qatar, óńir basshysy Qaraǵandy qalasynda ulttyq sport túrlerin damytý maqsatynda atshabar salynatynyn aıtty.
– Aımaqta ulttyq sport túrlerine qyzyǵýshylyq bildirgen turǵyndardyń qatary ósip keledi. Qazir bizdiń aımaqta 43 myńǵa jýyq turǵyn ulttyq sporttyń 11 túrimen aınalysada. Turǵyndar tarapynan kenshiler shaharyna ıppodrom kerektigi týraly ótinishter túsýde. Biz bul máseleni eskerdik. Aldaǵy ýaqytta memlekettik-jekemenshik áriptestik negizinde ıppodrom ashylady, – dedi Erlan Qoshanov.
Qaırat ÁBILDA,
«Egemen Qazaqstan»
Qaraǵandy