23 aqpan kúni Tuńǵysh Prezıdent Saıabaǵynda Qysqy júgirý jarysy ótti
Jarysty 3 km qashyqtyqqa júgirýden baq synasatyn balalar bastady. Jas júgirýshiler arasynda Ramazan Aınegov jeńipaz atansa, qyzdar arasynda Dıana Hanchı márege birinshi bolyp jetti.
Negizgi qashyqtyqqa (10 km) júgirý jarysyna qatysýshylar arasynan 33 mınýt 13 sekýndta kelip, ekinshi máreshiden nebári 52 sekýndqa alda kelgen Mıhaıl Krasılov, qyzdar arasynda 43 mınýt 42 sekýndta jaqsy nátıje kórsetken Anastasııa Chernaıa jeńipaz atandy. Qysqy júgirý jarysynyń eń júırik qatysýshylaryna birinshi oryn úshin 50 000 teńge, ekinshi oryn úshin 30 000 teńge jáne úshinshi oryn úshin 20 000 teńge kóleminde aqshalaı júlde berildi.
- Búgin sórege shamaman 1200 júgirýshi shyqty. Qatysýǵa nıet bildirýshilerdiń sany jyl saıyn artyp keledi. Bul sporttyń tek dene bitimi men densaýlyqty kútý tásili ǵana emes, sonymen birge zamanaýı sándi trendke aınalǵanyn kórsetedi. Uıymdastyrýshylar retinde mundaı qyzyǵýshylyqty qoldap, áýesqoı sportshylarǵa sportpen jeńil ári durys shuǵyldanýǵa kómektesýdi maqsat tutamyz, - dedi «Birinshi bolý - batyldyq» korporatıvtik qorynyń dırektory Saltanat Qazybaeva.
Aı saıyn «Almaty marafony» aıasynda qalanyń belgili júgirýshileri, dárigerleri men sportshylarynyń qatysýymen ashyq dárister ótedi. Sonymen birge ár senbi saıyn saǵat 10:00-de Tuńǵysh Prezıdent Saıabaǵynda júgirýden tegin jattyǵýlar ótedi. Júgirý jarystary kezinde atletterdiń densaýlyǵyna aıryqsha kóńil bólinedi.
- Júrek - júgirýshiniń basty bulshyqeti. Onyń jetkilikti damýy júgirýshilerdiń tózimdiligi men jalpy jaǵdaıyna áser etedi, – deıdi jarystyń qurmetti seriktesi, «Cardios» klınıkasynyń kardıolog dárigeri Bıbigúl Tólegenova. – Dene múshesiniń jumys qabiletin tekserý úshin klınıkalarda demalys kezindegi EKG jáne qozǵalys kezindegi EKG kómegimen júrekti standartty tekseristen ótkizgen jón.
Sporttyq-medısınalyq tekseristiń basty mindeti – aǵzanyń túrli deńgeıdegi salmaqtarǵa jaýap berýin baqylaý. Bul jattyǵýdyń qajetti qarqynyn tańdaýǵa jáne tezirek alǵa qoıǵan maqsatqa jetýge, ıaǵnı bulshyqet massasyn ósirýge, maıdyń paıyzyn azaıtýǵa, tózimdilikti arttyrýǵa kómektesedi. Tekseristen ótý sonymen birge bolashaqta qıyndyq týdyrýy múmkin zaqymdardy anyqtaýǵa septigin tıgizedi. Patologııa anyqtalsa, júgirýdiń ornyna asyqpaı júrgen áldeqaıda paıdaly.
Qysqy júgirý jarysy – sáýirdiń 21-de ótetin «Almaty marafony» 2019 iri sporttyq sharasyna daıyndyq kezeńindegi birinshi maýsymdyq sóre. Ortalyq Azııadaǵy eń úlken sporttyq sharaǵa tirkelý almaty-marathon.kz saıtynda sáýirdiń 1-ne deıin ashyq bolady.