Astanadaǵy Trıatlon parkinde Qazaqstandaǵy trıatlon maýsymynyń alǵashqy jarysy – Qysqy trıatlonnan Qazaqstan Respýblıkasynyń chempıonaty ótti. Saıysqa Elite jáne Age Group sanatyndaǵy sportshylar qatysty jáne «standart», «sprınt» qashyqtyǵynda synǵa tústi. Is-sharany saltanatty túrde Mádenıet jáne sport mınıstri Arystanbek Muhamedıuly ashyp, saıys qatysýshylaryna sáttilik tiledi.
Elite sanatynda 1 saǵ 28 mın 43 sek nátıjesimen Dmıtrıı Kolomees (Aqmola obl.) chempıon atandy. Al áıelder arasynda 1 saǵ 37 mın 28 sek ýaqyt kórsetken Natalıa Sakovnına (ShQO) jeńimpaz atandy.
Age Group sanatynda jeke esepte erler arasynda 41 mın 50 sek ýaqyt kórsetken Mark Starostıg (Astana q.) absolıýtti jeńimpaz atansa, áıelder arasynda Darıa Starostına úzdik atandy – 51 mın 41 sek.
Age Group sanatyndaǵy estafetalyq komandalar arasynda «Athletic Family» atty astanalyq komanda 44 mın. 23 sek. ýaqyt kórsetip, birinshi oryn aldy.
Barlyq jastaǵy toptardaǵy jeńimpazdar men júldegerlerge QTF Prezıdenti Kárim Másimov óz qolymen qundy syılyqtar men sertıfıkattar tabystady.
Sonymen qatar, osy negizgi is-shara aıasynda «TEMIRADAM Challenge» saıystar serııasynyń birinshi júgirý jarysy ótkizildi. Munda áýesqoı sportshylar 5 km jáne 10 km qashyqtyqta júgirýden baq synady.
«TEMIRADAM Challenge» júgirý saıysynda 10 km qashyqtyqqa júgirgenderde erler arasynda Nurlan Jakýpov (Astana q.) úzdik ýaqyt kórsetti – 33 mın 38 sek Al áıelder arasynda Aına Ýsenova (Astana q.) 47 mın 47 sek ýaqyt kórsetip, jeńimpaz atandy.
5 km qashyqtyqqa júgirýde 23 mın 03 sek ýaqyt kórsetken Aleksandr Mýlıak (Qaraǵandy obl.) birinshi boldy. Bul qashyqtyqtaǵy áıelder arasynda 24 mın 59 sek ýaqytymen márege jetken Dıana Asaýova (Qaraǵandy obl.) altyn aldy.
Júgirý saıysynyń jeńimpazdary men júldegerlerin Mádenıet jáne sport Vıse-mınıstri Eldos Ramazanov medaldar men qundy syılyqtarmen marapattady.
Aıta keteıik, jarysqa Astana, Almaty, Shymkent, sonymen qatar, Qaraǵandy, Pavlodar, Aqmola jáne Shyǵys Qazaqstan aımaǵynan 200 sportshy qatysty. Sonymen qatar, qysqy trıatlonnan QR chempıonatynda AQSh, Chehııa jáne Reseıden kelgen sheteldik áýesqoı sportshylar da baqtaryn synady.