27 aqpan kúni Polshada velotrekten álem chempıonaty shymyldyǵyn túredi. Atalǵan álemdik syn 2020 jylǵy Tokıo Olımpıadasyna upaı taratpaq. Qazaqstan komandasynyń kóshbasshysy Artem Zaharov Olympic.kz saıtyna suhbat berip, birinshilik aldyndaǵy basty maqsattardy atady.
«Komandadaǵy árbir veloshabandoz jekeleı synda baq synaıdy. Bárimizge qoıylǵan mindet ortaq– tuǵyr bıiginde turý úshin aıanyp qalmaý. Álem chempıonatynda basqa jarystarǵa qaraǵanda kóbirek upaı beriledi. Ásirese, Olımpıada aldyndaǵy jaǵdaıyńdy jaqsartýǵa múmkindik kóp. Men omnıýmda jarys jolyna shyǵamyn.
Komandamen birge toptyq kezeńge qatysý týraly usynys bolǵan. Alaıda, atalǵan báseke omnıýmnan bir kún buryn ótedi. Sol sebepti, bar kúshimdi ózimniń úırenshikti jarysyma qaldyrýdy jón kórdim. Jaqynda velosporttan «Oman týryna» qatysyp, Alekseı Lýsenkonyń jalpy esepte eki ret jeńimpaz atanýyna kómektestim. Kóp jumys atqaryldy. Júlde alatyn múmkindik qashan da bar. Tek, baq shapsa bolǵany», - deıdi Zaharov,
Álem chempıonatyn Polshanyń Prýjkov qalasy qabyldaıtynyn eske salamyz. Jarys 3 naýryzǵa deıin sozylady.