Týberkýlezge qarsy kúres dıspanseriniń dárigerleri Dúnıejúzilik týberkýlezge qarsy kúres aılyǵy barysynda óńirdegi epıdemıologııalyq jaǵdaıǵa jan-jaqty toqtaldy.
Olardyń sózine qaraǵanda, sońǵy 10 jylda ahýal 2,5 esege jaqsarǵan. Byltyr qaterli indetti juqtyrýdyń 353 faktisi tirkelgen. Bul kórsetkish 2017 jylmen salystyrǵanda 5,4 prosentke tómen. Dıspanserde týberkýlezdi emdeýdiń jańa ádisteri keńinen qoldanylady. Jeke jáne qysqa emdeý boıynsha 55 naýqas em-dom qabyldaǵan. Buryndary dimkás jandar emdi 2 jylǵa deıin qabyldasa, qazir emdelý merzimi eki esege qysqarǵan. Zerthanaǵa quny 52 mıllıon teńge turatyn “Baktek” apparaty satyp alynypty.
«Mekemede ttýberkýlezdi der kezinde anyqtaý úshin molekýlıarlyq genetıkalyq ádispen anyqtaıtyn “Gene xpert”qurylǵysy, «Bactec mgit» qondyrǵysy jumys isteıdi. Olardyń kómegimen týberkýlezdiń kez kelgen túri ońaı anyqtalady. 74,7 myń bala tekserýden ótti. 5,1 myń balaǵa dıaskenttest qoldanyldy», deıdi dıspanserdiń bólim meńgerýshisi Kenjegúl Áripova.
О́ńirde qaýipti dertti juqtyrý men odan bolatyn ólim-jitim sany azaıǵanymen, áli de ózekti. О́tken jyly 350 myńdaı adam flıýrografııalyq tekserilýden ótip, 200-den astamynan qaterli dert tabylǵan. Tek bıyldyń eki aıynda 12 balanyń osy aýrýǵa shaldyqqany belgili bolǵan.
О́mir ESQALI,
«Egemen Qazaqstan»
Soltústik Qazaqstan oblysy