Jyl sońyna deıin bıtkoınniń baǵamy birshama kóteriledi. IBM blokcheın jáne sıfrly valıýtalar jónindegi vıse-prezıdenti Djessı Land osyndaı boljam jasady.
– 2020 jylǵa deıin bıtkoınniń baǵasy 5 000 AQSh dollaryna kóterilýge tıis. Odan keıin de qymbattaı beredi, – deıdi ol.
Reddit áleýmettik jelisiniń negizin qalaýshy Aleksıs Oganıan da krıptovalıýtalardyń quny arta beretinin aıtty. Yahoo Finance-ke bergen suhbatynda ol:
– Krıptovalıýta naryǵyndaǵy biraz ýaqytqa sozylǵan quldyraýdyń paıdaly jaǵy da bar. Bul ındýstrııanyń alypsatarlardan tazaryp, naǵyz krıptoentýzıastarǵa orynnyń kóbeıýine áser etti. Daýryǵý basylyp, krıptovalıýta ınfraqurylymyna tıimdi sapaly jobalarǵa jol ashyldy. Bıtkoınniń da, satoshıdiń de qymbattaıtyn ýaqyty kelgen sııaqty, – deıdi A.Oganıan.
Qazirgi tańda 1 bıtkoın – 3 788,21 AQSh dollaryna nemese 1 423 173 teńgege teń ekenin aıta keteıik.
Arnur ASQAR,
«Egemen Qazaqstan»