Keshe Aqtóbede Premer-mınıstr A.U.Mamın oblys aktıvine qatysyp, B.M.Saparbaev Prezıdent Jarlyǵyna sáıkes Eńbek jáne halyqty áleýmettik qorǵaý mınıstri qyzmetine taǵaıyndalýyna oraı, buǵan deıingi atqarǵan qyzmetine oń baǵa berdi. Berdibek Máshbekuly Aqtóbe oblysynyń ákimi kezinde óńirdiń alǵa damýyna úlken serpin týǵyza bildi. Onyń bastamasymen kóptegen ınfraqurylymdyq jáne áleýmettik jobalar júzege asty deı kele, Úkimet basshysy aktıvke qatysýshylarǵa Prezıdent Jarlyǵymen Aqtóbe oblysynyń ákimi bolyp taǵaıyndalǵan O.S.Orazalındi tanystyrdy. Ári oblystyq máslıhat depýtattary ony qoldap daýys bergenin málimdedi.
Budan soń A.U.Mamın osy topyraqtyń perzenti ekenine toqtalyp, ol buǵan deıin ózine tapsyrylǵan jaýapty jumystardyń bárin de abyroımen oryndap kelgenin jetkizdi. Sonyń ishinde Ońdasyn Seıilulynyń áleýmettik sıpataǵy máselelerdi ońtaıly sheshe bilýdegi qarym-qabiletin atap ótip, jańa qyzmetine sáttilik tiledi.
Aktıv jınalysynda B.M.Saparbaev sóz alyp, halyqty áleýmettik jaǵynan qorǵaý sekildi elimizdegi asa jaýapty salany basqarýǵa taǵaıyndaǵany úshin Memleket Basshysy N.Á.Nazarbaevtyń senimin aqtaıtynyn jetkizdi. Sonymen birge ol birlese atqarylǵan nátıjeli jumystar úshin oblys aktıvine alǵysyn aıtty. Budan keıingi kezekte sóz sóılegen Aqtóbe qalasynyń jańa ákimi Ońdasyn Orazalın ata-babanyń kindik qany tamǵan jerde qyzmet atqarý birinshiden bıik mártebe bolsa, ekinshiden úlken jaýapkershilik ekenine ekpin túsirdi. Osy oraıda óńirdiń jańa basshysy buǵan deıingi jınaqtaǵan tájirıbesin Aqtóbe aımaǵynyń odan ári ósip-órkendeýine jumsaıtynyna, óńirde buǵan deıin júrgizilgen jaqsy ister odan ári jalǵasa beretinine toqtaldy.
Aktıvte oblystyq ardagerler keńesiniń tóraǵasy Keńes Birmanov B.M.Saparbaev oblys ákimi bolyp qyzmet atqarǵan 3,5 jylda óńirde aıshyqty izin qaldyra bilgenin aıtty. Onyń qarapaıymdylyǵy, kisiligi men kishiligi jóninde aqsaqaldyq tilegin arnady. Sodan keıin O.S.Orazalınniń aldynda turǵan ister de mol ekenin aıtyp, oǵan sát-sapar tiledi. Qazaqstannyń Eńbek Eri Quralaı Báımenova qoıan-qoltyq birlese atqarylǵan ulan-ǵaıyr jumystar úshin B.M.Saparbaevqa rızashylyǵyn jetkizip, onyń buǵan deıin jınaqtaǵan baı tájirıbesi jańa qyzmetine de oń yqpalyn tıgizetinin atap ótti. sonymen birge Quralaı Báımenqyzy oblystyń jańa basshysy O.S.Orazalın óńir úshin bóten adam emes ekenin aıtyp, óz oıyn jańa jobalardy júzege asyrýda aýyzbirshiligimiz ben yntymaǵymyz nyǵaıa bersin dep túıindedi. Osyndaı baǵyttaǵy lebiz ben oı-tujyrym óńirdegi «Stroıdetal» JShS-niń dırektory A.S.Sımonovtyń tarapynan da bildirildi.
Aktıv jınalysty Premer-mınıstr Asqar Mamın qorytyndylap, oblystyń jańa basshysy men aımaq aktıvi ortaq isti birlesip júzege asyra bildire beretinine senim bildirdi.
Temir Qusaıyn,
«Egemen Qazaqstan»
AQTО́BE