Aıdyń-kúnniń amanynda baýyr etiń balańnan kóz jazyp qalýdan aýyr ne bar? Aýyldan qalaǵa kóship kelip, vokzal mańynda ystyq tamaq satyp kúneltip júrgen Dúısenbaevtar otbasy 2000 jyly osyndaı qıyn jaǵdaıǵa dýshar boldy. 16-ǵa endi tolǵan qyzdary Ásel iz-tússiz joǵalyp ketti. Qyzynyń sýretin ǵana qushaqtap qalǵan ata-ana úshin azapty kúnder ótip jatty. Úmit te úzilgendeı edi...
Dýshanbe-Saratov baǵytyndaǵy poıyzǵa otyryp, Tájikstan elinen bir-aq shyqqan Ásel bul saparyna kim, ne sebep bolǵanyn aıta almaıdy (Múmkin aıtqysy kelmeıdi). Beıtanys ortaǵa, bóten jerge tap bolǵan qarshadaı qazaq qyzynyń basynan keshkenin taǵdyrdyń tálkegi degen bir aýyz sózben beıneleı salýdyń ózi qıyn. Dýshanbedegi dámhanalardyń birinde daıashy bolyp jan baǵyp júrgen jerinen qazaqstandyq azamat, kásipker Nurqasym Hamzaulymen tanyspaǵanda, ómiri solaı jalǵasa berer me edi?
Kásipkerdiń Tájikstanda júrgen qazaq qyzynyń týystaryn izdegen habary WhatsApp áleýmettik jelisinde tez taraldy. Osydan bir aı buryn Qurmanǵazy aýdanynyń turǵyny Turarbek Erǵalıev qyzdyń anasyn tanıtynyn aıtyp, telefon nómirin bergen. Bul habar eriktilerdiń de nazarlarynan tys qalmady. Adıla Qusaıynova men Rızabek Sultanııaev Áseldiń anasyna súıinshi habardy jetkizýge asyqqan.
«Ár qazaq - meniń jalǵyzym» degen óleń joly osyndaıda eriksiz eske túsedi. Atyraýlyq senator Sársenbaı Eńsegenov te jaǵdaıǵa alańdaýshylyq bildirip, QR Syrtqy ister mınıstrligine, Ulttyq qaýipsizdik komıtetine Áseldi taýyp, elge qaıtarýǵa qoldaý kórsetýdi ótinip, hat joldady.
«Mınıstr Beıbit Atamqulov Tájikstandaǵy elshilikke tapsyrma berip, qazaqstandyq dıplomattar joǵalǵan qyzdy tapty. Qolynda eshqandaı qujaty bolmaǵandyqtan, týǵan jeri Atyraýdan týý týraly aktilik jazbanyń kóshirmesin shuǵyl suratyp, sonyń negizinde elge qaıtyp oralýǵa arnalǵan kýálik rásimdeldi», - deıdi senator.
Elshilik qyzmetkerleriniń kómegimen Dýshanbeden Almatyǵa, odan Atyraýǵa jetken Ásel Dúısenbaevany áýejaıdan anasy men týystary kútip aldy. «Otanyma, otbasyma oralǵanyma qýanyshtymyn, kómektesken adamdardyń bárine sheksiz rızamyn», - deıdi Áseldiń ózi. Tájik elinde ótken ómiri týraly ashylyp syr aıtqysy kelmedi. Biz de qaýzaı qoımadyq. 19 jyl boıy jat jerde júrip, ana tilin umytqany bolmasa...
Ol oraldy. Qýanyshtysy da osy.
Baqytgúl BABASh,
«EgemenQazaqstan»
ATYRAÝ