Birinshi vıse-premer Álıhan Smaıylov Qazaqstan Ulttyq ekonomıka mınıstrliginiń ujymyna jańadan taǵaıyndalǵan mınıstr Rýslan Dálenovti tanystyrdy dep habarlaıdy economy.gov.kz.
Birinshi vıse-premer, mundaı memlekettik laýazymǵa ıe bolý Memleket basshysynyń joǵary seniminiń, sondaı-aq jeke, kásibı jáne iskerlik qasıetin baǵalaýynyń kórinisi ekenin atap ótti. Á. Smaıylov sondaı-aq, jańadan taǵaıyndalǵan Ulttyq ekonomıka mınıstri Rýslan Erbolatuly Dálenovtiń ekonomıkany turaqtandyrý men eldiń áleýmettik-ekonomıkalyq damýyn arttyrý jóninde Úkimet qoıyp otyrǵan mindetterdi tabysty oryndaýda jınaǵan tájirıbesi men bilimin, kásibı daǵdysyn qoldanatynyna senim bildirdi.
Birinshi vıse-premer Rýslan Dálenovtiń qarjylyq-ekonomıkalyq salada jetkilikti jumys tájirıbesi barlyǵyn atap kórsetti. Ol ár jyldary memlekettik basqarý júıesinde basshylyq qyzmet atqardy. 9 jyl boıy qarjy vıse-mınıstri boldy. Keıingi eki jyl ishinde Ulttyq ekonomıka birinshi vıse-mınıstri laýazymyn atqardy.
Sondaı-aq Álıhan Smaıylov vedomstvonyń Tımýr Súleımenovtiń basshylyǵymen júrgizilgen jemisti eńbegine rızashylyq bildirdi.
Rýslan Dálenov el basshylyǵy men Úkimetke zor senimi úshin alǵys aıta kelip, memlekettiń damýy jolynda aldaǵy ýaqytta tabandy jumys atqarýǵa daıyn ekenin bildirdi.
Mınıstr sonymen qatar, ujymnyń kásibıligin atap ótip, mınıstrliktiń halyqtyń ómir súrý deńgeıi men sapasyn arttyrý, el ekonomıkasyn odan arǵy ártaraptandyrý, shaǵyn jáne orta bıznesti damytý, jumys ornyn qurý tárizdi vedomstvo atqarýy tıis mindetterdi oryndaýǵa zor kúsh salatynyna sendirdi.
Rýslan Dálenov Qazaqstan Respýblıkasy Prezıdentiniń 2019 jylǵy 25 aqpandaǵy №855 Jarlyǵymen Ulttyq ekonomıka mınıstri bolyp taǵaıyndaldy.