Astanadaǵy qaıǵyly oqıǵanyń jańǵyryǵy: Aqtóbedegi muqtaj turǵyndardyń úılerine órt dabylyn habarlaǵyshtar tegin ornatylýda. Endigi 150 úı órt sóndirgishtermen, derbes datchıktermen jáne basqa da órt sóndirý quraldarymen qamtamasyz etildi.
Kómek kópbalaly aqtóbelikterge, jalǵyzilikti zeınetkerlerge, múgedek bala tárbıelep otyrǵan otbasylarǵa kórsetilip jatyr. Qajet bolǵan jaǵdaıda turǵyndardyń peshteriniń oshaqtary aldyna qorǵanysh qurylǵylaryn ornatyp, murjalardy jáne úıleriniń aldyndaǵy qoqystaryn tazartýǵa kómektesedi. Budan basqa, «Úmit» sábıler úıinde alty órt shkafy montajdalǵan.
Berikbaevtar otbasynda tórt bala bar, olardyń bireýi – erekshe búldirshin. Otaǵasynyń aıtýynsha endi ol úı ishi úshin burynǵydaı alańdaıtyn bolmaıdy. О́ıtkeni ornatylǵan qondyrǵy kishkene tútindegenniń ózine áser etedi.
«Balalar árıne, otpen oınamaıdy, biraq saqtanǵan jón bolar»,- deıdi Erbol Berikbaev.
Tunshyqtyratyn gaz datchıgi jumysynyń qaǵıdasy qarapaıym – oǵan tútin tıgen kezde ol qaýipti esertip, qatty daýys shyǵarady. Osy bir kishkene derbes «qorapshalardyń» arqasynda turǵyndar bólmeden ýaqytynda shyǵyp kete alady,- deıdi Aqtóbe oblysy Tótenshe jaǵdaılar basqarmasynyń bastyǵy Evgenıı Ovcharskıı.
«Jaqsylyq jasa» aksııasy aıasynda qyryqtan astam úıge qaıtarymsyz órt dabyldary ornatyldy. Taǵy elý datchıkti jergilikti atqarýshy organdar jaqyn arada satyp alýdy josparlap otyr. Sonymen birge, búkil oblys boıynsha 25 myń turǵynmen órt qaýipsizdigi nusqaýlyǵy júrgizildi. 16 myńnan asa agıtasııalyq materıal taratyldy.
Kishkentaı aqtóbelikterge de órt shyqqan kezde ózin qalaı ustaý kerektigi túsindirilýde. О́ńirdegi 79 mektepte ınteraktıvti sabaqtar júrgizildi.
Byltyr Aqtóbe oblysynda barlyǵy 475 órt bolǵan. Qaıǵyly oqıǵa 12 adamnyń ómirin jalmasa, onyń tórteýi balalar. Osy jyldyń qańtar aıynyń ózinde turǵyn úılerde 17 órt tirkelgen, japa shekkender joq.
Temir QUSAIYN,
«Egemen Qazaqstan»
Aqtóbe