Medısınalyq saqtandyrý qory Batys Qazaqstan oblysynda 2019 jyly halyqqa tegin qyzmet kórsetetin 51 densaýlyq saqtaý nysanymen 32 mlrd 959 mln teńgeniń kelisimshartyn jasady.
«Áleýmettik medısınalyq saqtandyrý qory» kommersııalyq emes aksıonerlik qoǵamynyń Batys Qazaqstan oblysy boıynsha fılıalynyń dırektory Nurjamal Jumaǵulova 2019 jyly tegin medısınalyq kómektiń kepildendirilgen kólemi sheńberinde kórsetiletin medısınalyq qyzmetterdi satyp alý jumystarynyń qorytyndysyn jarııa etti.
Kelisimshart bekitken emhanalar men klınıkalar kepildendirilgen tegin medısınalyq kómek paketi sheńberinde memlekettik tapsyrysty oryndaıtyn bolady.
Nurjamal Shamǵonqyzynyń aıtýynsha, kepildendirilgen tegin medısınalyq kómek paketinde qamtylǵan qyzmetterdi kórsetetin jetkizýshi-kompanııalardy aımaqtyq komıssııa irikteıdi. Komıssııa quramynda Medısınalyq saqtandyrý qory, «Atameken» ulttyq kásipkerler palatasy, pasıentter men densaýlyq saqtaý nysandarynyń múddesin qorǵaıtyn úkimettik emes uıymdardyń jáne Medısına qyzmetkerleriniń kásipodaǵy ókilderi bar.
2019 jyldyń basynda Áleýetti jetkizýshiler derekqoryna Batys Qazaqstan oblysy boıynsha 57 medısına uıymy engen eken. Onyń 38-i nemese 66,6%-y – memlekettik, 19-y nemese 33,4%-y – jekemenshik klınıkalar. О́tken jylmen salystyrǵanda memlekettik tapsyrysty oryndaýǵa qulshynys bildirgen jekemenshik klınıkalar sany artqany baıqalady.
Sonymen, Batys Qazaqstan oblysy boıynsha medısınalyq saqtandyrý qorynyń fılıaly 2019 jyldyń qańtar aıynda memlekettik tapsyrysty alý týraly 51 medısına uıymymen kelisimshart jasaǵan. Onyń 15-i – jeke menshik klınıka. Medısınalyq kómek kórsetetin jetkizýshi-uıymdarmen bekitilgen kelisimsharttyń jalpy somasy 32 mlrd 959 mln teńgeni qurady. Osynyń ishinde memlekettik emhanalar – 30 mlrd 402 mln teńge, jeke menshik klınıkalar – 2 mlrd 557 mln teńgeniń qyzmetin kórsetetin bolady.
- Jekemenshik medısına uıymdary stasıonardy almastyratyn kómek túrlerin kórsetýge de belsendi atsalysyp jatyr. Bıyl olardyń sany ótken jylmen salystyrǵanda 2-ge kóbeıdi, - deıdi Nurjamal Jumaǵulova.
Qazbek QUTTYMURATULY,
«Egemen Qazaqstan»
Batys Qazaqstan