Astanada 29 myń adamnyń eki nemese odan da kóp páteri bar, onyń 18 myńy jalǵa beriledi. Bul týraly Tengrinews.kz habarlady.
Oqyrman páterdi zańsyz jalǵa berýge jáne salyqtan jaltarýǵa qarsy kúres sharalary týraly surady. Sultanǵazıev «Azamattarǵa arnalǵan úkimettiń» málimetterine súıene otyryp, Astanada 29 myń jeke tulǵanyń eki jáne odan da kóp páteri baryn, olardyń ishinde 7,3 myń adamnyń jeke kásipker retinde tirkelip, 18 myń páterdiń jalǵa beriletinin málimdedi.
«Memlekettik kirister organdary turaqty negizde ýákiletti organdardyń qolda bar málimetterine monıtorıng júrgizý arqyly tirkeý esebine qoıý jáne salyq salýǵa tartý bóliginde jyljymaıtyn múlikti zańsyz jalǵa beretin tulǵalardy anyqtaý boıynsha sharalar júrgizedi, sondaı-aq, polısııa organdarymen birlesken sharalar júrgiziledi», - dep habarlady Sultanǵazıev.
Onyń aıtýynsha, 2018 jyly Astana boıynsha Memlekettik kirister departamenti jyljymaıtyn múlikti jalǵa berý salasyndaǵy qyzmetti júzege asyratyn 3,4 myń salyq tóleýshini tirkeý esebine qosymsha qoıǵan. Jalpy Astanada osy qyzmet túri boıynsha 14 myńnan asa salyq tóleýshi tirkelgen.