Bıyl Nazarbaev Ýnıversıtet Azııa elderi arasynda iri stýdenttik konferensııany ótkizý alańy retinde tańdap alyndy. «The Harvard College Project for Asian and International Relations 2019 Asia Conference (HPAIR 2019 Asia Conference)» konferensııasyn ótkizý quqyǵyn jeńip alǵan ýnıversıtettiń bul jetistigi az ýaqyt ishinde halyqaralyq dárejege erkin qanat jaıǵanyn kórsetedi.
Bul quqyqty joǵary oqý orny Sıngapýr, Japonııa, Qytaı, Taıvan jáne Úndistan ýnıversıtetteri arasynan ozyp shyǵyp ıelengen.
Nazarbaev Ýnıversıtettiń gýmanıtarlyq jáne áleýmettik ǵylymdar mektebiniń stýdenti jáne Nazarbaev Ýnıversıtettiń stýdenttik úkimetiniń prezıdenti, The HPAIR Astana 2019 uıymdastyrý komıtetiniń jetekshisi Leıla Ahmetova atap ótkendeı, túpkilikti sheshim qabyldaý maqsatynda Garvard ýnıversıtetiniń (AQSh) HPAIR uıymdastyrý komıtetiniń múshelerinen qurylǵan delegasııa jýyrda Astana qalasyna kelip, Nazarbaev Ýnıversıtettiń uıymdastyrý komıtetiniń múshelerimen kelissózder ótkizgen. Endi Nazarbaev Ýnıversıtettiń komandasy is-sharany birlesip daıyndaý maqsatynda Garvardqa attanady.
Aıta ketetin jaıt, HPAIR-2019 konferensııasy Astana qalasynda Jastar jyly aıasynda ótip, qazaqstandyq jas urpaqqa jańa múmkindikterdi usynady. Is-sharanyń kún tártibine alty taqyryptyq panel kiretinin aıta ketken jón. Iаǵnı, áleýmettik saıasat jáne ınklıýzıvtik damý, álemdik ekonomıka, qaýipsizdik jáne dıplomatııa, bıznes jáne tehnologııalar, qorshaǵan ortanyń turaqtylyǵy jáne energetıka, sondaı-aq mádenıet jáne medıa baǵyttary boıynsha seksııalar josparlanyp otyr.
Jalpy, Azııa jáne halyqaralyq qatynastar jónindegi Garvard jobasy Azııa elderinde Garvard ýnıversıtetiniń bastamasymen ótetin eń iri stýdenttik konferensııa sanalady. Keleli jıyn stýdentter men jas mamandar úshin Tynyq muhıty aımaǵyndaǵy jáne Azııa elderindegi eń mańyzdy ekonomıkalyq, saıası jáne áleýmettik máselelerdi talqylaý maqsatynda pikirtalas alańy retinde qurylǵan. Konferensııa 1991 jyldan bastap 32 myń qatysýshyny tarta otyryp, álemniń 12 elindegi joǵary oqý oryndarynda ótti. Konferensııanyń burynǵy spıkerleriniń arasynda tanymal ǵalymdar men Nobel syılyǵynyń laýreattary, dıplomattar, halyqaralyq uıymdardyń basshylary bar.
Mıras ASAN,
«Egemen Qazaqstan»