Bıyl Qonaev, Dostyq, Túrkistan, Aqmeshit kóshelerine birjaqty qozǵalys engiziledi dep habarlaıdy Astana qalasy ákimdiginiń resmı saıty.
«Búgingi tańda jańa kóshelerdiń qurylysyn eskere otyryp, birjaqty qozǵalys tujyrymdamasyn ázirleý jumystary júrgizilýde. Birinshi kezeńge sáıkes, bıyl Qonaev, Dostyq, Túrkistan, Aqmeshit kóshelerinde jalpy uzyndyǵy 11,2 km bolatyn Bus Lane qoǵamdyq kólik jolaǵymen birjaqty qozǵalysty engizý josparlanǵan. Bul ótkizý qabiletin 20%-ǵa arttyrýǵa, JKO sanyn 15%-ǵa tómendetýge, irgeles jatqan kóshelerge júktemeni azaıtýǵa, qoǵamdyq kólikke basymdyq berýge múmkindik beredi, sondaı-aq, bul sol jaq jaǵalaýdaǵy jalpy kólik jaǵdaıyna oń áser etedi» dedi Jol qozǵalysy jáne kólik ınfraqurylymy qaýipsizdigi bóliminiń basshysy Rýslan Ábdýalıev.
Ol kólik aǵynyn qalypqa keltirý úshin qalada jalpy uzyndyǵy 14,5 shaqyrymdy quraıtyn (Kenesary, Abaı, Jeltoqsan, Áýezov, Iаnýshkevıch, Mámbetov kósheleri) alty ýchaskede birjaqty qozǵalys engizilgenin atap ótti. 2018 jyly Jeltoqsan jáne Buqarbaı batyr kóshelerinde birjaqty qozǵalys engizilgen bolatyn.
«Búgingi tańda birjaqty qozǵalysty engizý óziniń tıimdiligin dáleldedi dep aıtýǵa bolady. Mysaly, kólik aǵynynyń ortasha jyldamdyǵy 33%-ǵa, ótkizý qabileti 25%-ǵa artsa, qıylystardaǵy kidiris ýaqyty 30%-ǵa tómendedi» dep túıindedi sózin ol.