26 aqpan kúni keshkisin Almatyǵa frıstaıl-mogýldan álem kýboginiń fınaldyq kezeńine qatysatyn sportshylar ushyp keldi. Ońtústik astanamyzǵa Olımpıada chempıondary – kanadalyq Mıkael Kıngsberı men fransııalyq Perrın Laffon, álem chempıony Iýlııa Galysheva bastaǵan Qazaqstan komandasy, álemniń vıse-chempıony Bendjamın Kavet pen ózge de sportshylar taban tiredi dep habarlaıdy Olympic.kz.
Sportshylar Japonııadaǵy álem kýbogi kezeńi aıaqtalǵan soń, Almatyny betke alǵan. Komandalar bizdiń elge jetý úshin jolǵa 13 saǵat ýaqytyn jumsady.
Mogýldan álem úzdikteriniń basym bóligi Qazaqstanǵa kelip jetti. Olardyń kópshiligi úshin bizdiń elimiz birinshi kezekte taýmen este qalǵan. Al Olımpıada chempıony Kıngsberı Dmıtrıı Reıherdpen dos ekenin aıtady.
«Ushaqta uıyqtamaýǵa tyrystym. О́ıtkeni, búgin túnde jaqsylap uıqymdy qandyrsam deımin. Bul Qazaqstanǵa birinshi ret kelýim. О́te qýanyshtymyn. Sońǵy jyldary Qazaqstannan shyqqan mogýlshylardy kóp keziktiremin. Sizderdiń taýlaryńyz da ádemi ekenin bilemin. Reıherd ekeýmiz jaqsy dostarmyz. Sizderdiń elderińiz týraly tek jaqsy jańalyqtar estidim», - deıdi Kıngsberı.
Al Perrın Laffon bizdiń mádenıetimizben jaqynyraq tanysýdy jón kóripti.
«Ushýǵa kóp ýaqyt jumsadyq. Meniń Qazaqstanǵa alǵashqy saparym bolǵandyqtan, mundaǵy jarys jolynda da birinshi ret baq synaımyn. Sondyqtan, qazirgi kóńil-kúıim tamasha. Qazaqstandy ádemi el dep estidim. Biraq sizdiń eldegi mádenıet pen dástúrli taǵamdardan beıhabarmyn. Osy olqylyqtyń ornyn toltyryp, Qazaqstanmen jaqynyraq tanysamyn», - deıdi Laffon.
«Shyny kerek, ushý ýaqyty uzaqqa sozyldy. Bes saǵat boıy Tokıoda, segiz saǵat Seýlde aıaldadyq. Bizdiń elge alǵash kele jatqan sportshylar Nursultan Nazarbaev týraly fılmdi tamashalady. Olarǵa tabıǵatymyz ben taýlarymyz unaǵan. Qala týraly málimet az bolǵandyqtan, qonaqtarymyz Almatyny aralaǵysy keledi. Al jarysqa keler bolsam, úzdik úshtikke enýge tyrysamyz», - deıdi Galysheva.
Frıstaıl-mogýldan álem kýboginiń fınaldyq kezeńi 2-3 naýryz kúnderi Almatyda ótedi.