Bul týraly Prezıdent Nursultan Nazarbaev «Nur Otan» partııasynyń kezekti XVIII sezinde aıtty.
«Biz asa aýqymdy tegeýrinder men jahandyq syndardyń zamanynda ómir súrip jatyrmyz. Bizdiń jınap qoıǵan rezervter kúrdeli kezeńderde paıdaǵa asýy tıis. Osy rezervterdiń arqasynda biz ońtústik-shyǵys daǵdarysynan 1997 jáne 2001 jyldardaǵy qıyn kezeńderden óttik. Biz 2007-2009 jyldardaǵy daǵdarystan da aman óttik. Sol sebepti, rezervter kerek. Biraq, qajet bolǵan jaǵdaıda birge el ıgiligine jaratatyn bolamyz» dedi Elbasy.
Sonymen qatar Elbasy óz sózinde qazirgi ýaqytta Qazaqstan naryq zamanyndaǵy memlekettiń basty mindeti - azamattarǵa jumys taýyp berý ekenin aıtyp ótti.
«Kómekke muqtaj sanattaǵy adamdarǵa berilip, ataýly sıpatqa ıe bolýy kerek. Men bul máseleni jeke baqylaýyma alamyn. Partııalastardy da bólingen qarajatty árbir otbasyǵa jetkizýde baqylaýǵa kómektesýdi suraımyn. Meniń tapsyrmam boıynsha búgingi tańda azamattardy alańdatatyn máselelerdi anyqtady. Ol máseleler - balaǵa bólinetin járdemaqy, kópbalalay otbasylardyń jaǵdaıyn jaqsartý, baspanamen qamtý. Partııanyń osy máselelerdi sheshýdegi mańyzdy úlesi - áleýmettik saıasatty úsh baǵyt boıynsha júzege asyrý. Birinshiden, halyqtyń az qamtylǵan bóliginiń kirisin arttyrý jáne qoldaý, ekinshiden, kirisi tómen azamattardyń turǵyn úı máselesin sheshý jáne bilim, densaýlyq saqtaý salasyn jaqsartý, úshinshisi, aımaqtardy keshendi túrde damytý» dedi Elbasy.
Sondaı-aq Prezıdent qazirgi tańda qazaqstandyq otbasylardyń jaǵdaıyn jaqsartýǵa mańyz berý keregin atap ótti.
«Osy jyldan bastap qańtar aıynda bazalyq aılyq mólsherin bir jarym esege ósirdik. Muǵalimderdiń aılyǵyn 30 paıyzǵa, biliktiligin arttyrǵan ustazdarǵa 50 paıyzǵa arttyrdyq. Demek, osy sanattaǵy azamattardyń kirisi aıtarlyqtaı ósti. Bul baǵdarmada bir mıllıon azamattyq qyzmetkerdi qamtıdy. Osy jyldyń 1 shildesinen bastap bıýdjet salasyndaǵy aılyǵy tómen qyzmetkerlerdiń jalaqysyn 30 paıyzǵa arttyrýdy tapsyramyn», - dedi Nursultan Nazarbaev.