Astanada ótip jatqan «Nur Otan» partııasynyń XVIII sezinde sóz sóılegen Halyqaralyq Túrki akademııasynyń Prezıdenti Darhan Qydyráli Táýelsizdik jyldaryndaǵy jetistikke toqtalyp, qazirgi tańda qazaq atanýdyń maqtanysh ekenin jetkizdi.
«Osy jeńisti, jemisti jıyrma jyldyń el shejiresine altyn áriptermen jazylary anyq. Azattyqtyń araıly tańynan kóshińiz quıyldy, jurtyńyz jıyldy! Asqaq Astana tórtkúl dúnıege tórelik aıtatyn, túgel túrkiniń tóri dep tanyldy. Oıdaǵy ornap, kóńil jaılandy. Bereke-birligi bekem baıtaǵyńyzǵa baqyt baılandy. Eń bastysy, qazaq bolý – úlken maqtanyshqa aınaldy! Partııa qashanda osy taǵdyrsheshti tarıhı isterdiń bel ortasynda júrdi. О́zegin ózińiz salyp bergen úlken úrdis jalǵasa beredi dep senemiz!» dedi D.Qydyráli.
Sondaı-aq Halyqaralyq Túrki akademııasynyń Prezıdenti «Nur Otan» partııasynyń baǵdarlamasy Elbasynyń qoǵamdyq kelisim týraly aıtqan ıdeıasymen saı keletinin jetkizdi.
«2011 jyly Túrkistanda zııaly qaýym ókilderimen kezdeskende qoǵamdyq kelisimniń kepili elimizdegi barlyq etnostardyń qazaq tili, qazaq tarıhy jáne mádenıetin meńgerýmen tikeleı baılanysty ekenin basa aıtqan edińiz. Búgingi mereıli mezette qabyldanǵan partııa baǵdarlamasy osy ıdeıańyzben qabysyp otyr. Partııanyń «qazaq halqynyń tilin, tarıhyn, dástúrlerin, gýmanıtarlyq jáne ımandylyq qaǵıdattaryn elimizde turatyn barlyq etnostyq toptardyń ókilderi arasynda keńinen nasıhattaý» týraly bastamasy jastardy patrıotızmge tárbıeleýmen birge, ulttyq biregeılikti qamtamasyz etedi dep oılaımyz» dedi D.Qydyráli.
Budan bólek, D.Qydyráli Elbasynyń «Uly dalanyń jeti qyry» maqalasy Baıqaldan Balqanǵa deıingi baýyrlas elderde jyly qabyldanǵanyn atap ótti.
«Siz bolat balqytyp, quryshtaı shyńdalǵan kóshbasshy retinde temirdi qamyrsha ılep, aǵashtan túıin túıgen, terini túrlendirip, kıizdi kestelegen dana babalarymyzdyń álemdik órkenıetke qosqan úlesin tap basyp, tanydyńyz! Osy oraıda, «Uly dalanyń jeti qyry» jylqynyń jalynda ósken jaýynger jurttyń qalǵyp ketken passıonarlyq rýhyn qaıta oıatqandaı boldy! Sondyqtan maqalańyzdy Baıqaldan Balqanǵa deıingi baýyrlas elder «ulttyq kod», «rýhanı ımmýnıtet» retinde qabyldady. Áziret qonǵan áz qala – Túrkistan qaıta túlep, Ortalyq Azııadaǵy yntymaqtyń rýhanı uıytqysy atandy. Uly dala – álemdik túrkologııanyń jańa baǵytyna aınaldy!» dedi D.Qydyráli.
Aıta keteıik, búgin Astanada Nur Otan» partııasynyń XVIII sezi ótip jatyr. Jıynǵa Elbasy Nursultan Nazarbaev qatysýda.