Iýrıı Popov kez kelgen mýzykalyq aspapta erkin oınaıdy. Ándi de jaqsy shyrqaıdy. Onyń adamdy tánti etetin basqa da qyrlary bar.
Endi qarańyz, negizgi mamandyǵy mýzykant bolǵanymen mektepte elektr qondyrǵylar boıynsha ınjener bolyp jumys isteıdi. Bul da onyń jan-jaqty óner ıesi ekenin aıǵaqtasa kerek. Al bos ýaqytynda, qoly qalt etkende nemen aınalysady deseńizshi? Tańdap alǵan súıikti isi, bylaısha aıtqanda, ermegi tańdandyrmaı qoımaıdy. Mehnatqa toly jankeshti, kúrdeli eńbek dese de bolady. Onyń biraz jyldan beri keme modeldeý isimen aınalysady. Birde ınternet paraqshalaryn aqtaryp otyryp kóne keme sýretterin keziktirip, kishireıtilgen nusqasyn jasaýǵa ańsary aýǵan. Eren qyzyǵýshylyq jeteginde birneshe kún ári-sári kúıge túsip júrgen. Aqyry aldyna maqsat qoısa soǵan jetkenshe tynym tappaıtyn tabandylyq qasıeti jeńip, úsh dińgekti jelkendi kemeni jasaýǵa baqandaı eki aıy ýaqytyn sarp etken. Oı, páli-aı deseńshi, kúndiz-túni kózdiń maıyn taýysyp, bir kúni jalyǵyp ketsem, tastaı salarmyn, odan eshteńem kete qoımas degen ishki saıtanı oıdyń ornyna erekshe bir kúsh paıda bolyp, tuma bulaqtaı bulqynyp ala jónelgenine áli kúnge deıin qaıran.
«Qolónerge burynnan birtaban jaqyndyǵym bar ed. Áshekeıli kezdik, pyshaq jasaýmen shuǵyldandym. Tipti teri óńdegen kezim de boldy,»deıdi segiz qyrly, bir syrly jan.
Bastapqyda tupnusqadan aınytpaýǵa tyryssa, qazir oı-qııalyna da erik berip qoıady. Máselen, eki dińgekti brıg kemesin úsh dińgekti etipti. Sonda burynǵydan da ádemirek, ásemdirek kóringen. Onyń aıtýynsha, jelkendi flot dáýirinde 12-16 adamdyq brıgter kópes kemelerin kúzetip, barlaýshy qyzmetin atqarǵan. Buıymdy jasamas úshin aldynala tarıhyn zerttep alyp, usaq-túıegine deıin erekshe mán bergen. Jýyrda onyń kolleksııasyn tolyqtyrǵan brıgtiń uzyndyǵy 70 santımetr, bıiktigi 80 santımetr. Oǵan juqa aǵash pen jelimdi ǵana qoldanǵandyqtan, salmaǵy jep-jeńil. Satysy, dińgekteri, shpıli, shtýrvaly, tipti zeńbirekterine de qaz-qalpynda ornatylǵan.
О́mir ESQALI,
«Egemen Qazaqstan»
Soltústik Qazaqstan oblysy