«Nur Otan» partııasynyń 20 jyldyǵyna arnalǵan sezge óńirlik konferensııalarda saılanǵan delegattar, Parlament depýtattary, memlekettik basqarý organdarynyń, ulttyq holdıngter men kompanııalardyń basshylary, azamattyq qoǵamnyń, úkimettik emes uıymdardyń jáne jastar qurylymdarynyń, halyqaralyq uıymdardyń, dıplomatııalyq korpýstyń, bastaýysh partııa uıymdarynyń, buqaralyq aqparat quraldarynyń ókilderi, ǵylym jáne mádenıet qaıratkerleri, partııa ardagerleri qatysty.
Negizgi otyrys bastalar aldynda Elbasy «Nur Otan» partııasynyń qazirgi jumysyna, partııany jańǵyrtýǵa jáne onyń tarıhyna arnalǵan arnaıy kórmeni aralady. Nursultan Nazarbaevqa Qazaqstan halqyna arnalǵan joldaý men «Bes áleýmettik bastamanyń» iske asyrylý barysyna monıtorıng júrgizýdiń jańa júıesi, sondaı-aq partııa jobalaryn júzege asyrýdyń nátıjeleri týraly jan-jaqty málimet berildi. Sonymen qatar, Qazaqstan Prezıdentine jańa «Sıfrlyq partııa» júıesiniń múmkindikteri tanystyryldy.
Memleket basshysy sóılegen sózinde Qazaqstannyń ótken 20 jyl ishinde qol jetkizgen jetistikterine toqtalyp, elimizdegi barlyq oń ózgeristerge yqpal etken «Nur Otan» partııasynyń rólin erekshe atap ótti.
– Bizdiń basty basymdyǵymyz – azamattarymyzdyń turmys sapasyn arttyrý jáne Qazaqstandy áleýmettik baǵyttaǵy memleket retinde damytý. Biz qıyn kezeńderdiń ózinde áleýmettik mindettemelerimizdi oryndadyq. Elimizde árdaıym áleýmettik salaǵa mol qarjy bólinip keldi, bul kórsetkish aldaǵy ýaqytta birte-birte arta beretin bolady, – dedi Elbasy.
Nursultan Nazarbaev elimizdegi azamattardyń turmys sapasy men ál-aýqatyn arttyrý úshin Ulttyq qordan qarajat bólinetindigi týraly aıtty.
Memleket basshysy áleýmettik saıasatty odan ári júzege asyrýdyń negizgi baǵyttaryna toqtalyp, ony iske asyrýǵa partııanyń belsendi atsalysýy qajet ekenin atap ótti.
– Partııa jurtshylyqtyń kúndelikti máselelerin sheshý isine belsendi atsalysýǵa tıis. «Halyqqa kómek» jobasy osy jumystardy jandandyrýǵa baǵyttalǵan. Búgingi tańda qoǵamnyń ózekti suranystaryna jedel jaýap berý jáne solarǵa memlekettik organdardyń nazaryn aýdartý mańyzdy másele sanalady, – dedi Nursultan Nazarbaev.
Sezd barysynda partııanyń «Baqýatty qoǵam: onjyldyqtyń 10 maqsaty» atty 2030 jylǵa deıingi jańa baǵdarlamasy, partııanyń Saıası keńesi men Ortalyq baqylaý-tekserý komıssııasynyń jańa quramy bekitilip, partııa jarǵysyna ózgertýler men tolyqtyrýlar engizildi, sondaı-aq partııanyń Saıası keńesi men Ortalyq baqylaý-tekserý komıssııasy jumystarynyń qorytyndylary jónindegi esepteri qabyldandy.