QR shańǵy jarysynyń Ulttyq federasııasy Avstrııanyń Zeefelde qalasynda ótip jatqan álem chempıonatynda Alekseı Poltoranınniń jarys jolyna shyqpaı qalýyna qatysty pikir bildirdi.
Buǵan deıin nemis jýrnalısti Haıo Zeppelt Tvıtterinde Avstrııanyń Zeefelde qalasynda shańǵy jarysynan ótip jatqan álem chempıonatynda Qazaqstan, Avstrııa men Estonııa sportshylary antıdopıngtik erejelerdi buzdy degen kúdikke ilingenin jazǵan edi.
Belgili bolǵandaı, avstrııalyq shańǵyshylar Domınık Baldaýf pen Maks Haýkeni qazirdiń ózinde polısııa ustaǵan. Olardan bólek, 15 shaqyrymdyq klassıkalyq jarys jolyna Qazaqstan quramasynyń kóshbasshysy Alekseı Poltoranın, sonymen birge estondyq Andreas Veerpalý men Karel Tammıarv shyqpaǵan. QR shańǵy jarysynyń Ulttyq federasııasynyń baspasóz hatshysy Samal Naýryzova málim etkendeı, bul jaǵdaı bárine kútpegen oqıǵa bolyp otyr.
«Buǵan deıin basqa BAQ kózderine habarlaǵanymyzdaı, biz kez kelgen ádiletsiz ádister men tyıym salynǵan sýbstansııalardy qoldanýǵa qarsymyz. Biraq, Alekseı Poltoranınniń antıdopıngti erejelerdi buzǵany dáleldengenshe, WADA, MOK, FIS-ten bizdiń federasııaǵa habarlama kelip, Alekseıge resmı túrde aıyp taǵylǵansha biz óz sportshymyzdy qorǵaımyz. Ázirge istiń mán-jaıyn anyqtalyp jatyr» deıdi federasııanyń baspasóz hatshysy.