Shymkentte sáýlet salasyndaǵy qyzmetterdi sıfrlandyrý boıynsha «Halyksaulet.kz», sanatorııalyq-kýrorttyq emdeý boıynsha elektrondyq platforma qurý boıynsha «Sankur shymkent», Shymkent qalasynyń mektepterinde demeýshilik kómek pen mesenattyqqa arnalǵan elektrondyq platforma qurý maqsatynda «Mektepke jardem» jobalary qolǵa alyndy.
Bul týraly Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Shymkent qalasy boıynsha departamenti men «Shymkent – adaldyq alańy» jobalyq keńsesi uıymdastyrǵan úkimettik emes uıymdardyń ókilderine arnalǵan trenıngte aıtyldy.
Qoǵamda sybaılas jemqorlyqqa qarsy mádenıetti qalyptastyrý maqsatynda ótkizilgen jıynda departament basshysynyń orynbasary Aıbek Shilmanov sybaılas jemqorlyqtyń aldyn alýdaǵy ÚEU-dyń róline toqtalyp, sybaılas jemqorlyqpen kúres qoǵamnyń belsene atsalysýyna muqtaj ekendigin jetkizdi.
«Memlekettik qyzmetterdi kórsetýdi jetildirý - sybaılas jemqorlyqtyń aldyn alýdyń negizi. Elektrondy túrde qyzmet alýdyń tıimdiligi kóp. Birinshiden, azamattar memlekettik mekemege barmaıdy, ıaǵnı azamattar men memlekettik qyzmetshiler tikeleı jolyqpaıdy. Ekinshiden, kezek kútpeıdi, barlyǵy jyldam júredi. Búgingi tańda kórsetiletin qyzmetterdiń 86 paıyzy elektrondy túrde alynýda. Bul baǵyttaǵy jumystyń baǵyty aıqyn», deıdi sala jaýaptysy.
Sybaılas jemqorlyqqa qarsy is-qımyl ulttyq bıýrosynyń Shymkent qalasy boıynsha departamentiniń mamandary sybaılas jemqorlyq faktileri baıqalǵan jaǵdaıda Agenttiktiń 1424 call-ortalyǵyna habarlaý qajettigin aıtty.
Nurshat TО́KEN,
«Egemen Qazaqstan»
Shymkent