Búgin Qazaqstan Premer-Mınıstri Asqar Mamın Úkimet úıinde Qyrǵyzstannyń vıse-premeri J. Razakovty qabyldady. Aýyl sharýashylyǵy salasyndaǵy yntymaqtastyq máseleleri jónindegi úkimettik kelissózder Qazaqstan Respýblıkasynyń vıse-premeri J. Qasymbek pen Qyrǵyzstan Respýblıkasynyń vıse-premeri J. Razakovtyń kezdesýi barysynda jalǵasty.
Úkimettik kelissózder qorytyndysy boıynsha Qyrǵyz Respýblıkasyndaǵy fıtosanıtarııalyq karantındik baqylaýdy kúsheıtý máseleleri boıynsha elderdiń fıtosanıtarııalyq qyzmetteri arasynda jol kartasyna qol qoıyldy. Qujatta 17 tarmaqtan turatyn is-sharalardyń naqty tizimi qarastyrylǵan, onyń birinshi kezekti tarmaqtaryn osy jyldyń aqpan aıynan bastap maýsym aıyna deıingi kezeńde Qyrǵyzstannyń fıtosanıtarııalyq qyzmeti iske asyrýy tıis.
Qyrǵyz tarapy Qazaqstanǵa kartop, alma jáne qurma jetkizýge qoıylǵan tyıymdy alyp tastaý týraly ótinish bildirdi. О́z kezeginde Qazaqstan 2018 jyl men 2019 jylǵy aqpan aralyǵynda anyqtalǵan 465 buzýshylyqty qyrǵyzdyń fıtosanıtarııalyq qyzmeti joıǵany týraly aqparatty qazaqstandyq tarap qaraǵannan keıin bıyl 19 aqpanda ýaqytsha engizilgen fıtosanıtarııalyq karantındik sharalardy alyp tastaýǵa daıyn ekenin bildirdi.
Memlekettik shekaranyń Qazaqstan–Qyrǵyzstan ýchaskesindegi veterınarlyq-sanıtarlyq baqylaý máselelerine erekshe kóńil bólindi.
Jalpy alǵanda, taraptardyń pikirinshe, baqylaýdyń sanıtarlyq-karantındik, veterınarlyq-sanıtarlyq, karantındik fıtosanıtarııalyq jáne basqa da túrleriniń baǵyttary boıynsha sharalar kesheni ekijaqty yntymaqtastyqty nyǵaıtyp, Eýrazııalyq ekonomıkalyq odaq aıasyndaǵy ózara is-qımyldy keńeıtýge jol ashady.
Budan ózge, sý-energetıka salasyndaǵy ortaq ustanymdar anyqtaldy. Transshekaralyq sý resýrstaryn esepteýdi avtomattandyrý týraly ýaǵdalastyqqa qol jetkizildi.