Bul týraly búgin Úkimet otyrysynda Energetıka mınıstri Qanat Bozymbaev aıtty.
«Elbasynyń «Nur Otan» partııasynyń sezinde aıtqan tapsyrmasyn oryndaý maqsatynda, mınıstrlik tarapynan óńirlerdegi birqatar jobalardyń qurylysyn jandandyrýǵa usynystar ázirlendi. Osy oraıda, bizdiń usynystarymyz boıynsha 2019-2025 jyldarǵa qosymsha 187 mlrd teńge talap etiledi. Sonyń ishinde, 2019-2021 jyldarǵa 55 mlrd teńge qaralýy tıis», dedi Q.Bozymbaev.
Mınıstrdiń aıtýynsha, 4 gaz taratý jelisin salý úshin 84,7 mlrd teńge bólý usynylady. Onyń ishinde Astananyń gaz ınfraqurylymyn salýǵa 44,4 mlrd baǵyttalyp, joba nátıjesinde 370 myń adam gazben qamtylady.
«Sonymen qatar, birneshe gaz jelisiniń qurylysyn qoldaýdy suraımyz. Atap aıtsaq, Qaraǵandy oblysynda, ıaǵnı Qaraǵandy, Temirtaý, Jezqazǵan jáne qosymsha 5 eldimekenge 28,7 mlrd teńge qajet. Bul joba 270 myń adamdy qamtıdy. Al, Aqmola oblysynda 10 mlrd teńgege 100 myń adam kógildir otynǵa qol jetkizedi. «Saryarqa» magıstraldy gaz qubyryn salý barysynda atalǵan jobalardy da iske asyrý óte mańyzdy. Jalpy, gazben qamtý jobalaryn iske asyrý nátıjesinde elimizdiń shamamen 740 myń turǵyny gazben qamtylatyn bolady», dedi Mınıstr.