Jalpy áleýmettik salaǵa osy jyly 150 mlrd teńge bólindi. Bul bıýdjet kóleminiń 35% quraıdy, dep málimdedi Astana ákimi Baqyt Sultanov QR Úkimetiniń otyrysynda. Bul týraly elorda ákimdiginiń baspasóz qyzmeti habarlaıdy.
«Nur Otan» partııasynyń HVIII sezinde Elbasy jarııalaǵan tapsyrmalar men bastamalar Astanamyzdyń áleýmettik-ekonomıkalyq damýyna serpin berip, mańyzdy jobalardy iske asyrýymyzǵa qarqyn beredi. Osy kúnge deıin biz, kómekke zárý 3 myńnan astam azamattardy qabyldadyq. Azamattar kótergen máselelerdi júıelendirip, elordamyzdyń áleýmettik kartasyn jasaqtadyq. Memleket basshysynyń tapsyrmasyna sáıkes, jergilikti bıýdjet qaıta qarastyrylyp, birqatar shyǵyndar ońtaılandyrylýda. Ol qarajat turǵyndar úshin qajetti qosymsha áleýmettik kómek berýge baǵyttalatyn bolady», – dep málimdedi Baqyt Sultanov.
Qalamyzda áleýmettik salaǵa osy jyly bólingen qarajat 150 mlrd teńgeni quraıdy. Bul bıýdjet kóleminiń 35% quraıdy. «Sonymen qatar, máslıhattyń aldaǵy otyrysynda bıýdjetti naqtylaý kezinde jergilikti bıýdjet esebinen muqtaj azamatardy qoldaý úshin 3 mlrd astam teńge kóleminde qarajat bólý qarastyrylatyn bolady»,– dep atap ótti ol. Ákimniń aıtýyna qaraǵanda, turǵyn úıdi paıdalaný men kommýnaldyq tólemderdi tóleýdi 18% kóterý, kópbalaly otbasylarǵa kómir satyp alý boıynsha kómek beriletin bolady. Qatty otynǵa bólinetin járdemaqy mólsheri de 8 aılyq eseptik kórsetkish 16-ǵa deıin ulǵaıǵan. Áleýmettik qyzmetterdi kórsetýge baǵyttalǵan áleýmettik joba aıasynda aýtıst balalarǵa tıisti arnaıy qyzmetter kórsetý úshin bıýdjetten 40 mln teńge bólindi. Budan bólek, búgingi tańda qalada qyzmet kórsetip júrgen ınvataksı kólikteriniń sany eki ese kóbeıtiledi dep josparlanýda. Qazir qalada mundaı qyzmetti 23 kólik kórsetedi.
Jumyspen qamtý baǵdarlamasynyń sheńberinde 2019 jyly jumyssyzdardy qoǵamdyq jumys oryndarymen qamtý 500-den 1000 adamǵa deıin kóbeıtilmek. Elordada áleýmettik-osal toptaǵy balalar úshin: qoǵamdyq kólikte jeńildikpen júrý, mektepterde ystyq tamaqpen qamtamassyz etý, saýyqtyrý demalysyna qosymsha 1 000 oryn berý, mektepke qajetti kıim men kerek-jaraqtaryn satyp alý jáne qosymsha granttar bólý sııaqty qoldaý kórsetiledi. Elbasy júktegen halyqtyń ál-aýqaty men ómir súrý sapasyn joǵarylatý jónindegi naqty tapsyrmalardy oryndaý aıasynda respýblıkalyq bıýdjetten qosymsha bólinetin transfertter boıynsha qala bıligi Eńbek jáne halyqty áleýmettik qorǵaý mınıstrligimen birlesip, jalaqysy tómen bıýdjet qyzmetkerleriniń eńbekaqysyn kóbeıtý, kópbalaly otbasylarǵa ataýly áleýmettik kómekti ulǵaıtý jumysyn pysyqtaýda. Baqyt Sultanov málimdegendeı, «Turǵyn úı qurylys jınaq júıesi arqyly kredıttik turǵyn úı salý» baǵyty boıynsha 900 páterdi osy jyly paıdalanýǵa berý josparda bar. Qala bıýdjetinde 2000 sertıfıkat berýge 2 mlrd teńge qarastyrylǵan.
Turǵyn úıdiń qoljetimdiligin qamtamasyz etý maqsatynda «Nurly jer» baǵdarlamasy aıasynda 731 páter jaldamaly baspana retinde úı kezeginde turǵan azamattarǵa paıdalanýǵa beriledi dep josparlanýda. «Elbasy bergen tapsyrmalarǵa sáıkes, qoljetimdi turǵyn úı qurylysyna respýblıkalyq bıýdjettegi transfertterden bólinetin qosymsha qarajatty qaıta qarastyramyz. Budan basqa, jergilikti bıýdjetti ońtaılandyrý esebinen únemdelgen qarajat osy úı qurylysyna jiberiletin bolady», – dedi Baqyt Sultanov. 2019-2021 jyldarǵa arnalǵan respýblıkalyq bıýdjette ınjenerlik jáne áleýmettik ınfraqurylymdy damytýǵa 174,5 mlrd. teńge, onyń ishinde 2019 jylǵa - 77,1 mlrd. teńge bólý qarastyrylǵan.