Etnıkalyq birlestikterdiń ókilderi «Qazaq eline myń alǵys!» monýmentine gúl shoqtaryn qoıdy. Bul týraly Astana ákimdiginiń baspasóz qyzmeti habarlady.
Alǵys aıtý kúnin merekeleý aıasynda Astana qalasynyń etnıkalyq birlestikteriniń ókilderi Botanıkalyq baqta «Qazaq eline myń alǵys!» monýmentine gúl shoqtaryn qoıdy. Alǵys kúni 1 naýryzda, Qazaqstan halqy Assambleıasynyń qurylǵan kúni merekelenedi. Meıramnyń basty ıdeıasy – qoǵamdyq kelisim men azamattyq biregeılikti, jalpyulttyq birlikti nyǵaıtý.
Mereke 2016 jyly Prezıdent Nursultan Nazarbaevtyń Jarlyǵymen bekitilgen. «Astana ákimi Baqyt Sultanovtyń atynan Sizderdi kele jatqan merekemen quttyqtaýǵa ruqsat etińizder. Jer aýdarýdyń qorqynyshty jyldaryn bastan keshken jáne Qazaqstandy jańa Otan tutqan adamdarǵa qurmet retinde bul kún barlyq qazaqstandyqtardyń jadynda qalady. Sol kezde erkinen tys birneshe ult ókili qazaq dalasyna jer aýdaryldy. Qazaq dalasy qanshalyqty keń bolsa, halyqtyń rýhy da sonshalyqty darhan. Jer aýdarylǵan halyqqa zor yqylas, kómek jáne qamqorlyq kórsetti. Qazaqstandy óz úıi sanaıtyn adamdardyń bir urpaǵy ósti. Úlkenderge óz etnosynyń dástúrlerin qoldaý jáne basqa halyqtardyń mádenıetin syılaǵany úshin alǵys aıtamyn», – dedi Astana qalasy ákiminiń orynbasary Nurlan Nurkenov.
«Qazaq eline myń alǵys!» monýmenti Astananyń 20 jyldyǵyn merekeleý aıasynda Qaraǵandy oblysynyń qoldaýymen ornatyldy. Ol qýǵyn-súrgin jyldary Qazaqstanǵa qonystanǵan kóptegen ult ókilderin qabyldaǵan qazaq halqynyń meıirbandyǵyn bildiredi. Kompozısııanyń ortasynda ózge ulttyń 3 sábıin qorǵashtap turǵan jas qazaq áıel beınelengen. «Búgin biz úshin tolǵanysqa toly kún. Biz gúl shoqtaryn qoıyp, sol jyldary kóptegen halyqtardy qushaq jaıa qarsy alǵany úshin qazaq jerine taǵy da alǵys aıtamyz. Meniń anam ótken jyly 100 jasqa toldy. Búgin ol baıyrǵy halyqtyń meıirimdiligi men kómegi bizge jańa úı, Otandy tabýǵa qalaı kómekteskenin kúlimsirep, tereń qurmetpen eske alady. Biz órkendeý men múmkindikterge toly tatý elde ómir súrip jatqanymyzǵa úlken rahmet aıtamyz», – dep óz áserimen bólisti Astana qalasy «Káristerdiń etnomádenı birlestigi» qoǵamdyq birlestigi tóraǵasynyń orynbasary Roza Pak.
Saltanatty sharaǵa QR Prezıdenti Ákimshiliginiń qyzmetkerleri, QHA depýtattary, etnomádenı birlestikterdiń ókilderi, «Jańǵyrý joly» respýblıkalyq jastar qozǵalysynyń belsendileri, qoǵam qaıratkerleri, elorda turǵyndary men qonaqtary qatysty. Alǵys kúnin merekeleý aıasynda Qazaqstanda 1,5 myńnan astam túrli mádenı-buqaralyq jáne qaıyrymdylyq is-sharalar ótedi. Olarǵa 1,4 mln astam adam qatysady dep kútilýde.