«Barys» qurlyqtyq hokkeı lıgasy pleı-off kezeńindegi ekinshi kezdesýin Nıjnıı Novgorodtyń «Torpedo» komandasymen ótkizdi. Bul týraly Qazaqparat tilshisi habarlady.
Eki kún buryn «Barys» atalmysh qarsylasynan 4:1 esebimen basym tústi.
Sondyqtan «Torpedo» búgingi oıynda ese qaıtarýǵa tyrysatyny belgili edi. Nıjnıı Novgorod qalasynyń komandasy dál solaı jasaýǵa baryn saldy.
Kezdesý bastalǵanda qos komanda da oıyn tizginin óz qolynda ustaýǵa tyrysty. Kóp jaǵdaıda «Barystyń» basymdyǵy baıqalyp turdy. Degenmen olar qorǵanys shebinde qatelikke jıi boı aldyrdy. Sondaı sáttiń birinde «Torpedo» hokkeıshisi Anton Volchenkovtyń qanjyǵasy maılandy.
Osylaısha reseılik komanda alǵa shyqty. Budan keıin «Barys» jigitteri shabýylda kóbirek boı kórsetti. Alaıda degenine jete alǵan joq. Esesine birinshi kezeńniń sońyna taman «Torpedo» taǵy bir shaıba soǵyp ketti. Bul gol 18-mınýtta Mıhaıl Varnakovtyń enshisine jazyldy.
Ekinshi kezeńde «Torpedo» basymdyǵyn arttyra tústi. Ekinshi kezeńniń bastalǵanyna bir mınýt ótpesten Robert Sabolıch bizdiń qaqpadan sańylaý tapty. Ol 26-mınýtta esepti budan da ulǵaıta tústi. Osylaısha tabloda «Torpedonyń» basymdyǵyn kórsetken 0:4 esebi jazylyp turdy. Oıyn barysynda elordalyq hokkeıshilerdiń shabýyly kóbirek órbip jatty. Dese de qorǵanys shebindegi qatelik kózge anyq kórindi. Soǵylǵan shaıbanyń barlyǵy osyndaı qatelikter saldarynan boldy. О́z qaqpasyna tórt shaıba soqtyryp alǵan «Barys» endi alǵa umtylmasa, jeńistiń aýyly uzap ketetinin anyq túsindi. Nátıjesinde 28-mınýtta Anton Sagadeev qarsylastar qaqpasyn dál kózdedi. Al 32-mınýtta Dmıtrıı Shevchenko esep aıyrmasyn qysqartty. Esep 2:4.
Úshinshi kezeńde «Barys» hokkeıshileri alǵa umtyldy. Degenmen óz oılaǵandaryn júzege asyra alǵan joq. Keıbir ýaqytta sáttilik jetispeı jatty. Al 54-mınýtta «Barys» sapynan Darren Dıs «Torpedo» qaqpasynan sańylaý tapty. Esep 3:4. Endi bizdiń komandaǵa tarazy basyn teńestirýge múmkindik týdy. «Barys» hokkeıshisi Mettıý Frettın 59-mınýtta tarazy basyn teńestirdi. Elordalyq jigitter 0:4 esebimen jeńilip jatyp, osylaısha esepti teńestirýge múmkindik aldy. Oıyn overtmaıǵa ulasty. Jeńis shaıbasyn Roman Starchenko soqty. Osylaısha «Barys» qarsylasynan ekinshi oıyn qatarynan basym tústi.