Parlament Senatynyń tóraǵasy Qasym-Jomart Toqaev Fınlıandııanyń Syrtqy saýda jáne damý mınıstri, Qazaqstan men Fınlıandııanyń saýda-ekonomıkalyq yntymaqtastyq jónindegi úkimetaralyq komıssııasynyń teń tóraǵasy Anne-Marı A.Vırolaınendi qabyldady.
Tóraǵa joǵary deńgeıdegi júıeli saıası únqatysýǵa negizdelgen Qazaqstan-Fınlıandııa qatynastarynyń erekshe sıpatyna toqtaldy. Q.Toqaev Memleket basshysy N.Nazarbaevtyń 2018 jyly Helsınkıge saparynyń nátıjeli bolǵanyn jáne onda kóptegen ekijaqty kelisimge qol qoıylǵanyn atap ótti.
Parlament joǵarǵy Palatasynyń basshysy Senattyń ózara parlamentaralyq is-qımyldy tereńdetýge múddeli ekenin atap ótip, fın depýtattaryn Qazaqstanǵa saparlap kelýge shaqyrdy.
Anna Marı Vırolaınen Q.Toqaevty Saýda-ekonomıkalyq yntymaqtastyq jónindegi úkimetaralyq komıssııanyń 11-shi otyrysynyń qorytyndysy týraly habardar etti. Onyń pikirinshe, kólik, logıstıka, energetıka, sıfrlandyrý jáne bilim berý salalary ózara tıimdi yntymaqtastyqtyń basym baǵyttary bolyp tabylady. «Qazaqstan - Ortalyq Azııadaǵy qozǵaýshy kúsh bolyp otyr. Kóptegen fın kompanııasy óz tájirıbesimen bólisýge daıyn», - dedi Fınlıandııa Syrtqy saýda jáne damý mınıstri.
Q.Toqaev fın eliniń bilim berý júıesiniń tıimdiligin aıta kelip, álemniń bilim berý keńistigine keńinen tanylǵan tájirıbeni zerdeleýge Qazaqstannyń múddeli ekenine toqtaldy.
«Fınderdiń zań shyǵarýdy júzege asyrý, sondaı-aq quqyq ústemdigin qamtamasyz etý, sybaılas jemqorlyqqa qarsy kúres, jalpyǵa birdeı ıgilikti qoǵam qurý úlgisin iske asyrý tájirıbesi biz úshin zor yqylas týǵyzady», - dedi Senat tóraǵasy.
Parlament joǵarǵy Palatasynyń tóraǵasy Memleket basshysy Nursultan Nazarbaevtyń áleýmettik qoldaýdy kúsheıtý jáne qazaqstandyqtardyń ómir súrý sapasyn jaqsartý jónindegi «Nur Otan» partııasynyń XVIII sezindegi asa mańyzdy bastamalary týraly aıtyp berdi.