Shyǵys Qazaqstanda barlyq 655 jalpy bilim beretin mektepterdi IT synyptarymen jabdyqtaý aıaqtalýǵa jaqyn. Memleket basshysynyń Joldaýy men «Meniń mektebim» óńirlik jobasyn iske asyrý aıasynda 2018 jyly óńir oqýshylarynyń 80 prosenti bilim alyp jatqan, tolyq komplektili 277 mektep Nazarbaev zııatkerlik mektebiniń standarty úlgisinde pándik kabınettermen, sondaı-aq, zamanaýı IT jáne robotty tehnıka synyptarymen jabdyqtalǵan bolatyn. Qazirgi tańda oblystaǵy shaǵyn komplektili mektepterdegi 378 IT-synypty jabdyqtaý aıaqtalýda. Bul maqsatqa oblys bıýdjetinen 900 mıllıon teńge bólingen. Jańa oqý jyly qarsańynda barlyq shaǵyn komplektili mektepterde 500 aktıv-panel ornatylady. Olar sońǵy sıfrlyq tehnologııalar negizinde oqýshylarǵa jaratylystaný men ǵylymı pánderdi erkin jáne sapaly meńgerýge tolyq múmkindik beredi.
Búgin Ulan aýdanyndaǵy Bazylbek Ahmetov atyndaǵy mektepte jańa IT-synybyn ashý rásiminde oblys ákiminiń orynbasary Ásem Núsipova oqýshylardy jańa «IT-synyptarynda baǵdarlamalaý jáne modeldeý» pánine oqytý úshin Semeı qalasynyń Elektrotehnıka kolledji bazasynda oblystyń shaǵyn komplektili mektepteriniń 573 muǵalimi arnaıy kýrstyq daıyndyqtan ótkenin habarlady. «Barlyq muǵalimder ádistemelik quraldar jáne arnaıy baǵdarlamalarmen qamtamasyz etildi. Bul aýyl balalary úshin baǵdarlamalaý, 3D modeldeý jáne mehatronıkany oqyp úırenýdiń jańa múmkindikterin ashady», – deıdi Ásem Bekqyzy.
Aıta keteıik, búgingi tańda aımaqtaǵy shaǵyn komplektili mektepterde 25 myń bala bilim alýda.
Azamat QASYM,
«Egemen Qazaqstan»
Shyǵys Qazaqstan oblysy